راچڵەکین-
لە دانیشتنی ئەمڕۆی پەرلەمانی ئێراندا متمانە لە عەبدولناسر هیممەتی، وەزیری دارایی و ئابووریی وڵاتەکە وەرگیرایەوە.

ئەمڕۆ یەکشەممە، بە ئامادەبوونی مەسعود پزیشکیان، سەرۆککۆماری ئێران و محەمەد رەزا فەرزین، سەرۆکی بانکی ناوەندی و بەشێک لە وەزیرانی ئەو وڵاتە، متمانە لە عەبدولناسر هیممەتی، وەزیری دارایی و ئابووریی ئێران سەندرایەوە.

لایەنگرانی بڕیارەکە باس لەوە دەکەن، سەندنەوەی متمانە لە وەزیری دارایی هاوکارییەکی باشە بە داهاتووی ئابووریی وڵات و دەڵێن "بۆچی وەزیری دارایی بەو بەرنامەیە کە لە کاتی دەنگدانی متمانەدا بۆ پەرلەمان ڕاگەیاندبوو، مامەڵەی نەکرد؟.. ئەم بڕیارە بۆ خراپی ئەدای وەزیر دەگەڕێتەوە و یارمەتیدەر دەبێت بۆ حکومەت.

هاوکات بەشێکی دیکەیان ئەو وەزیرە تۆمەتبار دەکەن بەوەی بەرپرسە لەو رێژە زۆرەی بەرزبوونەوەی دۆلار بەرامبەر تمەن و خراپی دۆخی ژیانی هاووڵاتییانی وڵاتەکە.

عەبدولناسر هیممەتی لە 21ـی مانگی هەشتی ساڵی رابردووەوە وەکو وەزیری دارایی و ئابووریی ئێران دەستبەکاربووە و لەو ماوەیەدا تمەن دابەزینێکی یەکجار زۆری بەرامبەر بە دۆلاری ئەمریکی بە خۆیەوە بینیوە و لە ئێستادا نرخی هەر 100  دۆلارێکی ئەمریکا بەرامبەر نۆ ملیۆن و 200 هەزار تمەنی ئێرانییە.