دامەزراوەی فۆردۆی ئەتۆمی ئێران

 

راچڵەكین-

ئاژانسی نێودەوڵەتی وزەی ئەتۆم بڕیارێكی دژ بە ئێران دەركرد، لەبەرامبەردا تاران كاردانەوەی توندی نیشاندا.

ئەمڕۆ پێنجشەممە 12ی حوزەیرانی 2025 ئاژانسی نێودەوڵەتی وزەی ئەتۆم  لەبڕیارێكدا ئاماژەی بەوەكردووە:" ئێران پابەندی بەڵێننامە ئەتۆمییەكان نەبووە."

لەبەرامبەردا حكومەتی تاران، سەرباری سەركۆنەكردنی بڕیارەكەی ئاژانسی نێودەوڵەتی وزەی ئەتۆم لەهەمان كاتدا رایگەیاند، لەكاردانەوەی ئەو بڕیارە:" ناوەندێكی نوێی پیتاندنی یۆرانیۆم لەناوچەیەكی سەلامەت دەخەینەكارو دەزگاكانی سەنتەر فیوج لەدامەزراوەی فۆردۆ نوێدەكەینەوە."

تاران دەڵێت:" بڕیارەكەی ئاژانسی نێودەوڵەتی وزەی ئەتۆم سیاسییە."

بڕیارەكەی ئەنجوومەنی پارێزگارانی ئاژانسی نێودەوڵەتی وزەی ئەتۆم كە لە 35 ئەندام پێكهاتووە، ئاماژەی بەوەكردووە:" ئێران لەساڵی 2019 وە سەركەوتوو نەبووە بەرامبەر پابەندییەكانی بە پێشكەشكردنی هاوكاری پێویست و لەكاتی دیاریكراوی خۆیدا بەئاژانسەكە لەبارەی ماددەو چالاكییە ئەتۆمییە شاردراوەكانی لەچەند پێگەیەكی جیاجیا، ئەوەش پابەند نەبوونی ئێران نیشاندەدات بەبڕیارەكانی ئاژانسی نێودەوڵەتی وزەی ئەتۆم."