راچڵەكین-
نوێنەرێكی كورد لەئەنجوومەنی نوێنەرانی عیراق دەڵێت، لەكۆبوونەوەی هەردوو شاندنی ئەنجوومەنی نوێنەرانی عیراق و توركیا، پێشنیاری كردووە، توركیا وەك نیاز پاكی، گەمارۆی سەر فڕۆكەخانەی نێودەوڵەتی سلێمانی هەڵبگرێت.
ئەمڕۆ سێشەممە 1ی تەمووزی 2025 شاندی ئەنجومەنی نوێنەرانی عیراق بەسەرۆكایەتی مەحمود مەشهەدانی سەرۆكی ئەنجومەن و ئەندامێتی ژمارەیەك لە پەرلەمانتاران لەباڵەخانەی پەرلەمانی توركیا لەگەڵ سەرۆك و ژمارەیەك لە ئەندامانی پەرلەمانی توركیا كۆبونەوە.
لەكۆبونەوەكەدا دۆسیەی ئاو و پەرەپێیدانی پەیوەندییەكانی نیوان هەردوولا تەوەركی سەرەكی بوون.
كاروان یاروەیس، ئەندامی شاندەكەی ئەنجوومەنی نوێنەرانی عیراق رایگەیاند، سەرخستنی پرۆسەی ئاشتی لەتوركیا و كۆتایی هێنان بەشەڕ گفتوگۆی لەبارەوە كرا.
ئاماژەی بەوەشكردووە:" لەكۆبونەوەكەدا وەكو پەرلەمانتاری پارێزگای سلێمانی و ئەندامی لیژنەی گواستنەوەی پەرلەمانی عیراق داوام كرد كە وەك دەستپێشخەری و پیشاندانی نیازپاكی دەوڵەتی توركیا گەمارۆی سەر فرۆكەخانەی نێودەوڵەتی سلێمانی هەڵبگرێت ، بەتایبەتی لەم كاتەدا كە پرۆسەی ئاشتی لە توركیا بەرەوپێشەوەچوونی بەخۆیەوە بینیوە."
"جەختمان كردەوە داخستنی ئاسمانی توركیا بەرووی فرۆكەخانەی نێودەوڵەتی سلێمانی بەشێوەیەكی سەرەكی هاوڵاتیانی هەردوو وڵات زیانمەند بوونە."