راچڵەكین-
كەوتنەوەی ئاگر لە ناوچەی پیشەسازی كواشێ سەر بە قەزای سێمێل لە سنووری پارێزگای دھۆك گیانلەدەستدانی دوو كەسی لێكەوتەوە.
ئەمڕۆ دووشەممە 13ی تشرینی یەكەمی 2025 بێوار عەبدولعەزیز بەرپرسی راگەیاندن و پەیوەندییەكانی بەڕێوەبەرایەتی بەرگری شارستانی دھۆك، رایگەیاند: "بەرەبەیانیی ئەمڕۆ دووشەممە، پەیوەندی بە ھێزەكانی بەرگریی شارستانییەوە كرا لەبارەی بوونی ڕووداوێك لە ناوچەی پیشەسازی كواشێ سەر بە قەزای سێمێل لە سنووری پارێزگای دھۆك."
وتیشی:" دەركەوت بارھەڵگرێكی تایبەت لەكاتی بەتاڵكردنی سوتەمەنی ئاگریگرت، تیمەكانی بەرگریی شارستانیی سێمێل گەیشتنە شوێنی ڕووداوەكە و ئاگرەكەیان كۆنتڕۆل كرد".
بێوار عەبدولعەزیز، ئاماژە ئەوەشكرد: "بەھۆی ئەو رووداوەوە دوو كرێكار بە ناوی (مەسعود حسێن) تەمەنی ٢٣ ساڵ و (قەیدار دیندار) تەمەنی ١٩ ساڵ سووتان و گیانیان لە دەستداوە، ھەروەھا شۆفێری تانكەرێكیش بریندار بووە".