راچڵەكین-

ئەمڕۆ 18-5-2021 سێ ساڵ بەسەر كۆچی دوایی عادل موراد یەكێك لەدامەزرێنەرانی یەكێتیی نیشتمانیی كوردستان ‌و سكرتێری ئەنجومەنی ناوەندی یەكێتی تێدەپەڕێت.

عادل موراد لە 11ی كانونی یەكەمی ساڵی 1949 لە شاری بەغدا لەدایكبووە و بڕوانامەی بەكالۆریۆسی لە كیمیادا لە زانكۆی بەغدا بەدەستهێناوەو یەكێك بوو لە دەستەی دامەزرێنەرانی یەكێتیی نیشتمانیی كوردستان.

هەروەها لە حكومەتی كاتی عیراقدا نوێنەری ی.ن.ك بوو لە بەغداو ماوەیەك نوێنەری تایبەتی سەرۆك مام جەلال بووە لە دیمەشق، لەگەڵ ئەوەشدا ماوەی چوار ساڵ باڵیۆزی عیراق بووە لە رۆمانیاو ماوەی چەند ساڵێكیش لێپرسراوی مەكتەبی ناوەندی راگەیاندنی ی.ن.ك بووەو پاشان لە كۆنگرەی سێیەمی یەكێتییدا وەك سكرتێری ئەنجومەنی ناوەندی یەكێتیی نیشتمانیی كوردستان دیاریكراوە.

ژیاننامەی عادل موراد

ئەندامی دەستەی دامەزرێنەری یەكێتی نیشتمانیی كوردستان و لێپرسراوی ئەنجوومەنی ناوەندی یەكێتیی بوو.

عادل موراد، لە دایكبوی ساڵی 1949 ی شاری بەغدادە و بە رەچەڵەك دەچێتەوە سەر كوردە فەیلییەكان.

خوێندنی سەرەتایی لە خوێندنگەی كوردانی فەیلی و ھەردوو قۆناغی ناوەندی و ئامادەیی لە بەغدا تەواو كردووە. لە ساڵی 1956 لە بەغدا پەیوەندی بە رێكخستنەكانی پارتی دیموكراتی كوردستانەوە كردووە.

لە ساڵی 1966دا لە بەشی كیمیای كۆلێژی پەروەردەی زانكۆی بەغدا وەرگیراوەو لەو ماوەیەدا سەرپەرشتی بەشێكی رێكخستنەكانی بەغدادی كردووە.

لە ساڵی 1969 كاتێك بەشێكی رێكخستنەكان ئاشكرا دەبن و واز لە خوێندن دەھێنێت و روو دەكاتە شاخ و دەبێتە پێشمەرگە.

لە ژیانی پێشمەرگایەتیدا دەبێتە ئەندامی ناوچەی پارتی لە ناوچەی باڵەكایەتی و لە ھەمان كاتدا لەبەر كەمی مامۆستای گوندەكان، لە خوێندنگەی یەكێك لە گوندەكان دەست بەكاری مامۆستایەتی دەكات.

پاش راگەیاندنی بەیاننامەی 11ی ئازاریی ساڵی 1970 لە كۆنگرەی یەكێتی قوتابیانی كوردستان بە سكرتێری یەكێتیەكە ھەڵدەبژێردرێت.

لەدوای ئەمە عادل موراد دەگەڕێتەوە بەغدادو تا ساڵی 1974 و بەر لە دەسپێكردنەوەی شەڕ لە نێوان كوردو رژێمیدا، بەغدا بەجێ دەھێڵیت.

دواترو لە پاش ھەرەس ھێنانی شۆڕشی ئەیلول لە ساڵی 1975 ئاوارەی ئێران دەبێت و ھەر لەو ساڵەشدا ئێران بەجێدەھێڵیت و روو دەكاتە وڵاتی سوریا.

كاتێك دەچێتە سوریا، لەوێ لەگەڵ مام جەلال پەیوەندی دروست دەكات و بەشدار دەبێت لە دامەزراندنی یەكێتیی نیشتمانیی كوردستان.

دوا بەدوای دامەزراندنی یەكێتی، لێپرسراوێتی رێكخستنی نێو وڵاتی دەكەوێتە ئەستۆ و دواتریش بۆ دروستكردنی رێكخستن لە ئەوروپا، دەچێتە ئەوروپا و توانی بناغەیەك بۆ رێكخستنی یەكێتی لە چەند وڵاتێكی ئەوروپی دابنێت.

پاش گەڕانەوەی بۆ سوریا، لەگەڵ ئەندامانی دیكەی دەستەی دامەزرێنەردا سەرقاڵی دابینكردنی پێویستیەكانی دەستپێكردنەوەی خەباتی چەكداری دەبێت لە كوردستان و لەم رووەوە لێپرسراوی ئەركە لۆجستیەكان و ناردنی مەفرەزە سەرەتاییەكانی بۆ ناو وڵات دەكەوێتە ئەستۆ...

لە مانگی كانوونی دووەمی ساڵی 1979 دەگەڕێتەوە بۆ كوردستان و لە ناوزەنگ دەگیرسێتەوە.

بەڵام لە مانگی شوباتی ھەمان ساڵدا، لەبەر ھەندێك ھۆكاری سیاسی واز لە یەكێتی دەھێنێت و دەگەڕێتەوە بۆ سوریا، پاشان لە رۆژنامەی سەفیر وەك رۆژنامەنووس دەست بەكار دەبێت.

لە ساڵی 1981 پەیوەندی بە حزبی سۆسیالیستی كوردستان دەكات و لە كۆنگرەی یەكەمی ئەو حزبەدا كە لە مانگی ئایاردا بەسترا، بە ئەندامی كۆمیتەی سەركردایەتی ھەڵدەبژێردرێت.

پاشان و لە ساڵی 1994 پەیوەندی بە ریزەكانی یەكێتیی نیشتمانیی كوردستانەوە دەكاتەوەو پلەی ئەندامی كۆمیتەی سەركردایەتی پێدەدرێت.

دواتر لە شاری ھەولێر لێپرسراوێتی مەكتەبی ناوەندنی راگەیاندی یەكێتی پێ دەسپێردرێت و تا ساڵی 2000 بەردەوام دەبێت.

ھەر لە ھەمان ساڵدا وەك لێپرسراوی پەیوەندییەكانی یەكێتی لە سوریا دیاریدەكرێت.

لە كانوونی دووەمی ساڵی 2003دا دەگەڕێتەوە بۆ كوردستان و بەشدار دەبێت لەو ھەوڵانەی كە بۆ رژێمی بەعس لە ئارادا بوون.

لەگەڵ رووخانی رژێمی بەعس لە ساڵی 2003دا دەچێتە بەغداو ئەركی پەیوەندی و دیپلۆماتكارانە دەگرێتە ئەستۆو ماوەیەكیش لە ئەنجوومەنی حوكم  نوێنەری سەرۆك مام جەلال دەبێت.

ساڵی 2004 دەبێتە باڵیۆزی عیراق لە رۆمانیا

لە دوای ئەوەی لە ساڵی 2010 لە كۆنگرەی سێیەمی یەكێتیی نیشتمانیی كوردستاندا خۆی بۆ كۆمیەتی سەركردایەتی ھەڵنابژێرێت. لە ساڵی 2012دا لێپرسراوێتی ئەنجومەنی ناوەندی یەكێتیی پێدەدرێت. كە ئەمە دوایین وێستگەی كاری سیاسی بەگشتی و بەتایبەتیش لە ناو یەكێتیی نیشتمانیی كوردستان دەبێت.

رۆژی 18-5-2018 عادل موراد یەكێك لە دامەزرێنەری یەكێتیی نیشتمانیی كوردستان بەهۆی نەخۆشییەوە لە وڵاتی ئەڵمانیا كۆچی دوایی كرد.

س- پیوكەی میدیا