جگه‌ره‌كێشان ئه‌گه‌ری توشبوون به‌م نه‌خۆشییانه‌ی‌ چاو زیاد ده‌كات

ڕاچڵه‌كین-

جگەرەکێشان هۆکارێکی سەرەکییە بۆ گەلێک نەخۆشی لاشە و جەستەی مرۆڤ بۆ نموونە نەخۆشی سییەکان و دڵ و شێرپەنجە، دكتۆر ئه‌حمه‌د پزیشکی پسپۆڕی چاو ئه‌و نه‌خۆشییانه‌ ڕوون ده‌كاته‌وه‌ كه‌ به‌هۆی كێشانی جگه‌ره‌وه‌ توشی مرۆڤ ده‌بێت.


لێرەدا باسی چەند زیانێکی جگەرەکێشان دەکەین بۆ سەر تەندروستی چاو :

1- وشکی چاو : واتە نەبوونی فرمێسکی پێویست یان نەبوونی فرمێسکی ئاسایی، جگەرەکێشان هۆکارێکی گرنگە بۆ وشکی چاو.

2- ئاوی سپی : ئەوانەی جگەرە دەکێشن زووتر توشی ئاوی سپی دەبن بە بەراورد بەوانەی جگەرە ناکێشن .

3- تێکچوونی تۆڕی چاو ( AMD ) : بەهۆی ئەم نەخۆشییەوە مرۆڤ سەنتەری بینینی تێک دەچێت ، بەمەش نەخۆش ناتوانێت شتەکان بە ڕوونی ببینێت ، چارەسەری ئەم حاڵەتەش هەندێک جار زەحمەتە و  نەخۆش دەبێت زیاتر لە جارێک دەرزی لە ناو چاوی بدرێت.

4- زوو دەرکەوتنی کاریگەری نەخۆشی شەکرە لەسەر چاو ، نەخۆشی شەکرە بە تێپەڕبوونی کات کاردەکاتە سەر چاو ، بەڵام لە کەسانی جگەرەکێشدا زۆر تر و زوو تر کاری تێ دەکات.

5- لاواز بوونی دەماری چاو : ئەم دەمارە چاو پەیوەست دەکات بە مێشکەوە ، مرۆڤ بەهۆی ئەم دەمارەوە دەبینێت ، جگەرە دەبێتە هۆی لاواز کردنی ئەم دەمارە و پاشان کوێر بوون.

6- زیاتر دەرکەوتنی نیشانەکانی غوددەی دەرەقی لە سەر چاو ، ئەوانەی نەخۆشی غوددەی دەرەقیان هەیە هەندێک جار کار لە چاویان دەکات ، بەڵام لە کەسانی جگەرەکێشدا زۆرتر و زوو تر کاری تێ دەکات .