راچڵەكین-
لەگەڵ ئەوەی ماوەی دوو مانگە لیوا هاوبەشەكانی پێشمەرگە مووچەیان پێنەدراوەو چاوەرێی ئەوەن لەلایەن هاوپەیمانی نێودەوڵەتی مووچەكانیان پێ بدرێت، بەڵام تائێستا سۆراخێكی روون و ئاشكرای مووچەكانیان نییەو بەرپرسانی وەزارەتی پێشمەرگەش ناتوانن هیچ وادەیەك بۆ دابەشكردنی ئەو مووچەیە دیاری بكەن.
فەریق جەبار یاوەر- ئەمینداری گشتی وەزارەتی پێشمەرگە ئەمڕۆ چوارشەممە بە ( راچڵەكین)ی راگەیاند، بەهۆی ئەوەی ئەم هەفتەیە پشووی جەژنی نەورۆز بووە، تائێستا دیاری نەكراوە كەی مووچەی ئەو لیوا هاوبەشانە دابەشدەكرێت، لەهەفتەی ئایندەوە بەرچاو روونیان دەبێت.
لەسەر هەمان پرس، عوسمان سێدەری- سەرۆكی لیژنەی پێشمەرگە لەپەرلەمانی كوردستان بە( راچڵەكین)ی راگەیاند:" وەك لیژنەی پێشمەرگە بەدواداچوونمان كردووە لەسەر ئەو بابەتە، كێشەكانیان لە نزیكترین كاتدا چارەسەر دەبێت، هۆكاری دواكەوتنەكەشی بۆئەوە دەگەڕێتەوە تا ئێستا مووچەكانیان لە لایەن هاوپەیمانانەوە تەمویل نەكراوە بۆیە مووچەكانیان دواكەوتووە".
پێشتریش لیوا قارەمان كەمال، جێگری سەرۆك ئەركان لە وەزارەتی پێشمەرگە بە راچڵەكین-ی راگەیاندبوو:" هەرچەندە بڕیار بوو رۆژی ١٥ی مانگ مووچەی لیوا هاوبەشەكانی پێشمەرگە دابەشبكرێت، بەڵام بەهۆی نەناردنی پارەكە لە لایەن ئەمریكاوە دابەشكردنی مووچەكە دواكەوتووە و نازانین هۆكاری دواكەوتنەكەشی بۆچی دەگەڕێتەوە".
سەبارەت بەوەی كە ئایا كەی مووچەكانیان دابەشدەكرێت وتیشی:"نازانین، چاوەڕێ دەكەین ئەو پارەیە بگاتە دەستمان و دواتر مووچەكانیان دابەشبكرێت".
كۆتایی مانگی رابردوو، نوسینگەی رۆژنامەوانی وەزیری پێشمەرگەی حكومەتی هەرێمی كوردستان، لە راگەیەنراوێكیدا بڵاویكردەوە:" بۆ ئەم مانگە لیوا هاوبەشەكان سێ موچە پێكەوە بەبێ لێبڕین بە ڕێژەی لەسەدا 100% وەردەگرن ."
پێشتریش مستەفا چاوڕەش- فەرماندەی یەكەكانی 70 لەبارەی چاككردنی مووچەی تەواوی هێزەكانی پێشمەرگە رایگەیاندبوو:" چاككردنی مووچەی هەموو هێزەكانی پێشمەرگە لە دەسەڵاتی حكومەتدایە.
لیوا هاوبەشەكانی پێشمەرگە لە 14 لیوا پێكهاتوون و مانگی رابردوو مووچەیان بەبێ لێبڕین بەسەردا دابەشكرا، هەرچەندە بڕیاربوو هەر لەو مانگەدا سێ مووچەی تر وەك قەرەبووی مانگەكانی رابردوو وەربگرن، بەڵام بەووتەی بەرپرسانی پێشمەرگە بەهۆی ئەوەی پارەكە نەخراوەتە سەر هەژمارەی بانكی وەزارەتەكە تائێستا ئەو سێ مووچەیە دابەشنەكراوە.