مەسرور بارزانی، سەرۆكی ئەنجومەنی وەزیران
راچڵەكین –
سەرۆكی حكومەتی هەرێمی كوردستان، بەبۆنەی هاتنی حەژنی قوربان، پەیامێكی پیرۆزبایی ئاراستەی مسوڵمانانی كوردستان دەكات و بەهۆی بەرزبوونەوەی ئامارەكانی كۆرۆناش، داوا لە هاووڵاتیان دەكات ڕێكارەكانی خۆپارێزی و ڕێنماییە تەندروستییەكان لەبەرچاو بگرن.
مەسرور بارزانی لەو پەیامەیدا كە ئەمڕۆ هەینی بڵاویكردووەتەوە، رایگەیاندووە،" بە بۆنەی هاتنی جەژنی پیرۆزی قوربانەوە، گەرمترین پیرۆزبایی ئاراستەی موسڵمانانی كوردستان و عێراق و جیهان دەكەم، بە تایبەتی پێشمەرگە قارەمانەكان و هێزەكانی ئاسایشی ناوخۆ و كەسوكاری سەربەرزی شەهیدان و ئەنفالكراوان. هیوادارم ڕۆژانی جەژن، بە شادی و ئاسوودەیی بەسەر ببەن".
سەرۆكی حكومەتی هەرێم ئاماژەی بەوەشكردووە كە بەپێی ئامارەكانی وەزارەتی تەندروستی، ڕێژەی تووشبوون بە كۆرۆنا لەم ڕۆژانەدا لە بەرزبوونەوەدایە، بۆ ئەم مەبەستەش داوای لە هاووڵاتیان كردووە، رێكارەكانی خۆپارێزی و رێنماییە تەندروستییەكان لەبەرچاو بگرن.