راچڵەكین -
لیژنەی دارایی ئەنجومەنی نوێنەرانی عیراق، لەپرۆژەیاسای بودجەی گشتی، حكومەتی هەرێمی كوردستان پابەند دەكات لە خەرجییە داراییەكاندا، ئەولەویەت بە دابەشكردنی مووچەی فەرمانبەران بدات و لەئەگەری جیاوازیكردن لەنێوان پارێزگاكان و خەرجنەكردنی شایستە داراییەكانی هەر پارێزگایەك، حكومەتی فیدراڵی بەشە بودجەی پارێزگاكە دەبڕێت و راستەوخۆ رادەستی پارێزگاكەی دەكات.
ئەمشەو لیژنەی دارایی ئەندجومەنی نوێنەران، دەنگی لەسەر هەردوو ماددەی 13 و 14 لە پرۆژەیاسای بودجەی گشتی دا، كە تایبەتن بە شایستە داراییەكانی هەرێمی كوردستان.
لەخاڵی 9 لە ماددەی 13ی پرۆژەیاسای بودجە، حكگومەتی هەرێمی كوردستان پابەندكراوە ئەولەویەت بە خەرجكردنی مووچەی فەرمانبەران و خانەنشینان بدات، لەگەڵ پابەندكردنی بە خەرجكردنی شایستە داراییەكانی پارێزگاكان بەپێی پێوەرە كارپێكراوەكانی یاسای بودجە بە شێوەیەكی دادپەروەرانەو بێ جیاوازی، بەپێچەوانەوە حكومەتی فیدراڵی بەشە پارەی پارێزگای ناڕازی دەبڕێت و بەشێوەیەكی راستەوخۆ رادەستی پارێزگاكەی دەكات.
ناوەڕۆكی ئەو بڕگەیە، یەكێك بووە لە داواكارییەكانی فراكسیۆنی یەكێتیی نیشتمانیی كوردستان، كە لەگەڵ گەڕاندنەوەی پاشەكەوتی مووچەی فەرمانبەران، كاری بۆكردووە لەناو پرۆژەیاسای بودجەی گشتی عیراق جێگیربكرێت.