راچڵەكین -
كچە خوێندكارێكی قۆناغی چوارەمی زانكۆ لە شاری بەغدا، لەكاتی ئاهەنگی دەرچوون، بەهۆی دانانی وێنەی سەدام حسێنی-ی دیكتاتۆری لەسێدارەدراوی عیراق لەسەر كڵاوی دەرچوون، بڕیاری فەسڵكردنی دەدرێت.
دوای ئەوەی دوێنێ چوارشەممە، گرتەیەكی ڤیدیۆی ئاهەنگی دەرچوونی خوێندكارانی قۆناغی چوارەمی كۆڵیجی رافیدەین-ی ئەهلی (كلیة الرافیدن الجامعة) بڵاوكرایەوە، كە تێیدا دەردەكەوێت كچە خوێندكارێك وێنەیەكی سەدام حسێن-ی سەرۆكی لەسێدارەدراوی عیراقی لەسەر كڵاوی دەرچوون داناوە، راگرایەتی كۆلێژەكە لیژنەی لێكۆڵینەوەی پێكهێناو ئەمڕۆ پێنجشەممە بڕیاریدا بە فەسڵكردنی خوێندكارەكە.
خوێندكارە سزادراوەكە ناوی عەبیر تارق عەلوان-ەو خوێدكاری قۆناغی چوارەمی بەشی تەكنیكی تاقیگەی پزیشكییە، بەگوێرەی بڕیارەكەی كۆلێجی رافیدەین-ی ئەهلی، كە بەواژۆی د. مەحمود جەواد، راگری كۆڵیژ دەرچووە، تێیدا هاتووە، بەهۆی سەرپێچیكردنی خوێندكارەكە لە دیسپلین و رێنماییەكان بە دانانی وێنەی سەرۆكی رژێمی لەناوچوو لەسەر كڵاوی دەرچوون، ئەم كارەشی لەناو حەرەمی زانكۆ ئەنجامداوە، بۆیە بڕیاردرا بە دەركردنی لە زانكۆ.