راچڵەكین -
هەریەك لە ئەمریكا و بەریتانیا لەچوارچێوەی سەپاندنی سزای نوێ بەسەر رووسیا، بڕیاریاندا هاوردەكردنی ئەلەمینۆم و مس و نیكڵی بەرهەمهێنراوی ئەو وڵاتە قەدەغە بكەن.
وەزارەتی گەنجینەی ئەمریكا لە ڕاگەیاندراوێكدا، بڵاویكردەوە، واشنتۆن بە هەماهەنگی لەگەڵ لەندەن، بڕیاریاندا، ڕووسیا لە داهاتەكانی فرۆشتنی كانزاكانی ئەلەمنیۆم و مس و نیكڵ بێبەش بكەن.
لە راگەیەندراوەكەدا هاتووە، ئەمریكا و بەریتانیا جگە لە قەدەغەكردنی هاوردەكردنی ئەلەمنیۆم و مس و نیكڵی بەرهەمهێنراوی رووسیا، هاوكات بڕیاریشیاندا بازرگانیكردن بەو بەرهەمانەی رووسیا لە بۆرسە جیهانییەكانی تایبەت بە كانزاكان قەدەغە بكەن.
لەو چوارچێوەدا، بەرهەمەكانی ئەلەمنیۆم و مس و نیكڵی بەرهەمهێنراوی رووسیا، لە بۆرسەی لەندەن بۆ كانزاكان و بۆرسەی بازرگانیكردن لە شیكاگۆ، قەدەغەكران.
وەزارەتی گەنجینەی ئەمریكا ئاماژەی بەوەشكردووە، واشنتۆن و لەندەن بە هاوبەشی هەوڵەكانیان خستووەتەگەڕ، بۆ ئەوەی رووسیا لە داهاتی ئەو سەرچاوە گرنگە بێبەش بكەن.
لای خۆیەوە وەزارەتی دارایی بەریتانیا لە ڕاگەیاندراوێكدا ئاماژەی بەوەداوە كە رووسیا لە ڕێگای فرۆشتنی ئەلەمنیۆم و مس و نیكڵ، 40 ملیار دۆلاری دەستدەكەوێت.
لە سەرەتای دەستپێكردنی جەنگی نێوان رووسیا و ئۆكراینا، تائێستا ئەمریكاو بەریتانیاو وڵاتە هاوپەیمانەكانیان، هەزاران سزای جۆراوجۆریان بەسەر رووسیادا سەپاندووە، لە بەرامبەریشدا رووسیا وەك وەڵامدانەوەیەك، سزای جۆراوجۆری بەسەر ئەو وڵاتانەدا سەپاندووە كە بەوڵاتی نادۆست پۆلینی كردوون.