راچڵەكین -
بەڕێوەبەرایەتی ئاوی سلێمانی رەتیدەكاتەوە گرفت لە دابەشكردنی ئاو لە شارەكە هەبێت، هەڕەشەی سزادانی ئەو كەسانەش دەكات كە ئاو بەفیڕۆ دەدەن.
ئامانج جەلال ، وتەبێژی بەڕێوەبەرایەتی ئاوی سلێمانی، بە میدیای فەرمی یەكێتی راگەیاندووە، هیچ گرفتێك بۆ دابەشكردنی ئاو لە گەڕەكەكانی شاری سلێمانی نییە و دابەشكردنی ئاو ئاساییە.
وتیشی:" ئەو ئاوەی كە لەلایەن ئێمەوە دابەشدەكرێت، لەلایەن تاقیگەكانی خۆمان و تاقیگەكانی تەندروستی سلێمانییەوە بەردەوام پشكنینی بۆ دەكرێت".
وتەبێژی بەڕێوەبەرایەتی ئاوی سلێمانی ئاماژەی بۆئەوەشكرد، ئەو تەنكەرانەی كە لۆگۆی بەڕێوبەرایەتی ئاوی سلێمانیان لەسەر نییە و ئاو بە هاوڵاتیان دەفرۆشن، ئێمە لێی بەرپرس نین، چونكە لە تەندروستی و پاكیی ئاوەكە دڵنیانین.
ئامانج جەلال، هۆشداریی ئەوەشیدا هەر هاووڵاتییەك ئاو بەفیڕۆ بدات، لەلایەن بەشی زیادەڕوی لە بەڕێوەبەرایەتی ئاوی سلێمانی ، سەرەتا ئاگاداردەكرێتەوە و دواتر سزای ماددی دەدرێت و بۆ ماوەیەكی كاتیش ئاوەكەی دەبڕدرێت.