راچڵەکین-

 

وەزارەتی تەندروستی چەند رێنماییەکی بۆ کەمکردنەوەی مەترسییەکانی قەڵەوی بڵاوکردەوە.

وەزارەتی تەندروستی بڵاویکردەوە: کێشی زیادە و قەڵەوی بەشێوەیەکی بەرچاو ئەگەری تووشبوون بە نەخۆشییە درێژخایەنە مەترسیدارەکان زیاد دەکات، لەوانە نەخۆشییەکانی دڵ، جەڵتەی مێشک، شەکرە و چەند  جۆرێکی شێرپەنجە، ئەم مەترسییە لەگەڵ بەرزبوونەوەی پێوەرەکانی بارستەی جەستە (BMI) زیاد دەکات.

ئاماژەی بەوەشکرد: خۆشبەختانە زۆرێک لە هۆکارەکانی کێشی زیادە و قەڵەوی دەتوانرێت ڕێگری لێبکرێت. زۆرجار هۆکاری بنەڕەتی ناهاوسەنگییە لە نێوان وەرگرتنی کالۆری و بەکارهێنانی کالۆری، کە ئەمەش دەگەڕێتەوە بۆ خۆراکە چڕ و چەورییە زۆرەکان و شەکردارەکان و کەمبوونەوەی چالاکیی جەستەیی بەهۆی شێوازی ژیانی مۆدێرنەوە.

باسی لەوەشکرد: بۆ کەمکردنەوەی مەترسییەکانی قەڵەوی پێویستە وەرگرتنی کالۆری لە چەوری و شەکرەکان کەمبکرێتەوە و پرۆتین و میوە و سەوزە و دانەوێڵەی تەواو و چەرەزاتەکان لە خۆراکدا زیادبکرێن. هەروەها پێویستە چالاکیی جەستەیی بەردەوام 60 خولەک لە رۆژێکدا بۆ منداڵان و 150 خولەک لە هەفتەیەکدا بۆ گەورەکان ئەنجام بدرێت، هەروەها بۆ کۆرپە، شیرپێدانی سرووشتی بۆ ماوەی شەش مانگی یەکەم مەترسی قەڵەوی لە داهاتوودا کەمدەکاتەوە.