راچڵەكین -

تەندروستی غەززە ئاماری قوربانیانی 10 مانگی رابردووی هێرش و بۆردومانەكانی ئیسرائیل بۆسەر كەرتی غەززە بڵاودەكاتەوەو ئاشكرایدەكات، لەماوەی 24 كاتژمێری رابردوودا زیاتر لە 130 كەسی دیكە كوژران و بریندار بوون.

ئەمڕۆ 7-8-2024، 10 مانگ بەسەر دەستپێكردنی شەڕی غەززە لەنێوان سوپای ئیسرائیل و چەكدارانی حەماس تێپەڕدەبێت كە بەهۆیەوە بەشێكی زۆری كەرتی غەززە وێران بووەو نزیكەی دوو ملیۆن كەس لە دانیشتووانەكەشی ئاوارەو دەربەدەر بوون.

وەزارەتی تەندروستی لە كەرتی غەززە، لە راگەیەندراوێكدا بڵاویكردەوە، لەماوەی 24 كاتژمێری رابردوودا لەئەنجامی هێرش و بۆردومانەكانی سوپای ئیسرائیل بۆسەر ناوچەكانی كەرتی غەززە، 24 هاووڵاتی دیكەی مەدەنی كوژران و زیاتر لە 110 كەسیش بریندار بوون.

وەزارەتەكە ئاشكرایكردووە، لە دەستپێكی هێرشەكانی ئیسرائیل بۆسەر كەرتی غەززە تاوەكو ئێستا، 39 هەزارو 677 كەس كوژراون، ژمارەی بریندارانیش بۆ 91 هەزارو 645 كەس بەرزبووەتەوە، كە زۆربەیان ژن و منداڵن، هاوكات لە ناوچەكانی كەناری رۆژئاواش 629 كەس كوژراون و هەزاران كەسی دیكەش بریندار بوون.

بەپێی نوێترین زانیارییەكانی نەتەوە یەكگرتووەكان، هەزاران كەس لە دانیشتووانی كەرتی غەززە كە بەهۆی شەڕەوە ماڵ و حاڵیان جێهێشتووەو ئاوارەی ناوچەكانی باشوور بوون، رووبەڕووی قەیرانێكی سەختی مرۆیی بوونەتەوەو نەبوونی ئاوو خۆراكی پێویست هەڕەشە لە ژیانیان دەكات.