راچڵەكین-

لەهەواڵێكی شۆكهێنەردا بۆ هەوادارانی درامای كۆریای باشور، هەواڵی مردنی لەناكاوی لی سانگ- بۆی هونەرمەندی كۆریا لەتەمەنی 44 ساڵیدا  بڵاوكرایەوە.

كۆمپانیا Korea Management Group كە سبۆنسەری كارەكانی ئەو هونەرمەندە دەكات لە ڕاگەیەندراوێكدا ئاماژەی بەوەكردووە، سانگ- بۆ لەماڵەكەی خۆیدا لە مردوویی دۆزراوەتەوە، بەبێ ئاشكراكردنی هۆكاری مردنەكەی لەسەر داخوازی كەسوكارەكەی.

میدیای كۆریای باشوری بڵاویكردووەتەوە، لەئێستادا پۆلیسی ئەو وڵاتە لێكۆڵینەوەكانیان لەهۆكاری گیانلەدەستدانی سانگ- بۆ دەستپێكردووە" هیچ بەڵگەیەك لەبەردەستدا نییە بیسەلمێنێت ڕووداوەكە تاوانكاری بووە."

لی سانگ - بۆ لەساڵی 2006 وە كاروانی هونەری لەڕێی بەشداریكردن لە زنجیرەی  Invisible Man Choi Jang Soo  دەستپێكرد، بەبەشداریكردنیشی لە درامای  Miss Monte-Cristo ناوبانگێكی زۆری بەدەستهێنا.

سانگ- بۆ لە ساڵی 2022دا رووبەڕووی بارودۆخێكی نەخوازراو بوەوە، كاتێك پۆلیس بە تۆمەتی بەكارهێنانی مادەی هۆشبەر دەستگیریكرد، ئەوەش كاریگەری لەسەر ناوو ناوبانگی دروستكرد. بەڵام دوای لێكۆڵینەوە و پشكنینەكان، بێتاوانیی سانگ- بۆ سەلمێندرا و دەركەوت كە ئەو ئەكتەرە تەنیا دەرمانی دژە خەمۆكی و هێوركەرەوەی بەكارهێناوە، بەهۆی لەدەستدانی ئەندامانی خێزانەكەی.