راچڵەكین -
لە گرتوخانەیەكی چاكسازیی لەسنووری پارێزگای بابل-ی ناوەڕاستی عیراق، دوو زیندانیكراو هەڵدێن و هێزە ئەمنییەكانیش هەڵەمتێكیان بۆ دەستگیركردنەوەیان دەستپێكردووە.
میدیاكانی ناوخۆی عیراق بڵاویانكردەوە، ئەمڕۆ هەینی لە گرتوخانەی چاكسازیی حللە، رووداوێكی هەڵاتن روویداوەو بە وتەی سەرچاوەیەكی ئەمنی، دوو زیندانیكراو هەڵاتوون و تائێستاش دەستگیر نەكراونەتەوە.
بەگوێرەی گرتەیەكی ڤیدیۆیی كە لە تۆڕە كۆمەڵایەتییەكاندا بڵاوكراوەتەوە، هەردوو زیندانیكراوەكە دەرفەت دەهێنن و بەبێ بوونی هیچ پاسەوانێك، بەسەر دیواری گرتوخانەكەوە دەربازیان دەبێت و بەرەو شوێنێكی نادیار هەڵدێن.
لەدوای رووداوەكە، هێزێكی زۆری ئەمنیی پارێزگای بابل هەڵمەتێكیان بۆ دەستگیركردنەوەی دوو زیندانیكراوە هەڵاتووەكە دەستپێكردووە، بەڵام تائێستا هەوڵەكەیان سەركەوتوو نەبووە.