راچڵەكین -
سەرۆكایەتی شارەوانی سلێمانی ژمارەیەك بڕیار و نوسراو ئاڕاستەی بەڕێوەبەرایەتییەكانی تۆماركردنی خانووبەرە دەكات بەمەبەستی تەواوكردنی رێكارەكانی تایبەت بە مامەڵەكانی دابەشكردنی زەوی نیشتەجێبوون، داواش لەو كەسانە دەكات كە سوودمەندبوون لە بڕیاری وەرگرتنی زەوی، سەردانی سەرۆكایەتیی شارەوانیی سلێمانی بەشی موڵكایەتی زەوی و زار، بكەن.
سەرۆكایەتی شارەوانی سلێمانی لە راگەیەندراوێكدا بڵاویكردەوە، ئاماژە بە بڕیاری سەرۆكایەتیی ئەنجوومەنی وەزیران ژمارە (٢٦٢٠) لە (٢٠٢٣/٦/٢١)وە بڕیاری ئەنجوومەنی شارەوانی ژمارە (١٢٥) لە (٢٠٢٤/٧/١٠) تایبەت بە دابەشكردنی زەوی پاڵپشت بە (ماددەی ٣٠ یاسای ژمارە ٦ ساڵی ١٩٩٦ هەمواركراو) لە یاسای بەڕێوەبردنی شارەوانییەكان، ئەمڕۆ، پێنجشەممە، 31-7-2025، (١٢) بڕیار و نووسراوی سەرۆكایەتیمان ئاڕاستەی بەڕێوەبەرایەتییەكانی تۆماركردنی خانووبەرە كران بەمەبەستی تەواوكردنی كاری جیاكردنەوە و رێكارەكان تا بتوانرێت لە ئایندەیەكی نزیكدا مامەڵەكانی دابەشكردنی زەوییەكەیان و بەناوكردنیان بۆ تەواوبكرێت.
شارەوانی سلێمانی داوای لەو كەسانە كردووە، كە سوودمەند بوون لەو بڕیارەی قوباد تاڵەبانی، سەردانی سەرۆكایەتیی شارەوانیی سلێمانی بەشی موڵكایەتی زەوی و زار بكەن.
لە راگەیەندراوەكەدا ئاماژە بەوەكراوە، تائێستا (٢٢) بڕیار نێردراوە بۆ جێبەجێكردنی كاری جیاكردنەوە و ژمارەیەكی زۆر كەم ماون لە بڕیارەكان و چاوەڕێی تەواوكردنی رێكارە هونەری و یاساییەكانین لە فەرمانگە پەیوەندیدارەكان، تا لە نزیكترین كاتدا هەوڵبدرێت كاری لەسەر بكرێت و تەواو بكرێت.