راچڵەكین-

لە گوندی مێرگەتیای سەر بە قەزای  ئامێدی گۆڕێكی بەكۆمەڵ دۆزرایەوە كە رووفاتی حەوت شەهیدی تێدا بووە.

وارشین سەلمان، قائیمقامی ئامێدی بەمیدیای فەرمی یەكێتی راگەیاندووە:" گۆڕەكە لە گوندی مێرگەتیا دۆزراوەتەوە و لەلایەن تیمێكی پسپۆڕەوە گۆڕەكە هەڵدراوەتەوە."

وتیشی:" ئەو رووفاتانەی لە گۆڕەكەدا بوون سەرجەمیان خەڵكی گوندی مێرگەتی بوون، لە ساڵی 1988دا لەلایەن رژێمی بەعسەوە گوللـە باران كراون و  بە پۆشاكی خۆیانەوە كە كوردییە خراونەتە گۆڕێكی بە كۆمەڵەوە".

 قائیمقامی ئامێدی روونیكردەوە؛ وەزارەتی شەهیدانی هەرێمی كوردستان رووفاتی شەهیدەكانی بۆ پزیشكی دادی دهۆك گواستووەتەوە و پشكنینی DNA یان بۆ ئەنجامدەدرێت، بۆ ئەوەی ناسنامەكانیان ئاشكرا بكرێت، دواتریش لە گوندی مێرگەتیا لە مۆنۆمێنتێكدا بە خاكدەسپێردرێن.