راچڵەکین -

بافڵ جەلال تاڵەبانی، سەرۆكی یەكێتیی نیشتمانیی كوردستان، لەبارەی رووداوەكەی لالەزار پەیامێك بڵاودەكاتەوەو رایدەگەیەنێت: گرووپێكی میلیشیای نایاسایی، كە لە دەرەوەی یاسا كاریان دەكرد، چەند ناوچەیەكی نیشتەجێبوونیان بە سەربازگە كردبوو، ژیانی خەڵكی بێتاوانی خستە مەترسییەوە و بوونە هۆی ئەوەی ئەو دامەزراوانەش، كە ئەركیان پاراستنی كۆمەڵگەیە بە كەم بزانرێن.

سەرۆكی یەكێتی لە پەیامەكەیدا كە ئەمڕۆ 31ی ئابی 2025 بڵاویكردووەتەوە، راشیگەیاندوەو،" داوا لە دەسەڵاتی دادوەریی دەكەین، ئەركی خۆیان بە پابەندبوون بە یاسا جێبەجێ بكەن و دادپەروەر و شەفاف بن، لە هەمانكاتدا دڵنیاببنەوە لەوەی كە مافی هەموو تاكێك پارێزراوە. نابێت كاری گرووپێكی میلیشیایی زاڵ بێت بەسەر ویستی هاونیشتمانیان بۆ ئاشتی، یەكڕیزیی و دیموكراسی".

دەقی پەیامەكە:

هەفتەی رابردوو، سلێمانی شاهێدی كۆمەڵە رووداوێك بوو، كە بووە هۆی خەم و پەژارە بۆ خێزانەكانیان و نیگەرانیی بۆ رای گشتی.

گرووپێكی میلیشیای نایاسایی، كە لە دەرەوەی یاسا كاریان دەكرد، چەند ناوچەیەكی نیشتەجێبوونیان بە سەربازگە كردبوو، هێرشیان كردە سەر هێزە فەرمییە ئەمنییەكان، كە لەو كاتەدا ئەركی دەستگیركردنی داواكراوانیان پێ سپێردرابوو، كە ئەركیان پاراستنی گیان و ماڵی هاووڵاتیان و سەقامگیریی شارەكەیە. ئەم كارانەی گرووپەكە ژیانی خەڵكی بێتاوانی خستە مەترسییەوە و بوونە هۆی ئەوەی ئەو دامەزراوانەش، كە ئەركیان پاراستنی كۆمەڵگەیە بە كەم بزانرێن.

لەم بارودۆخانەدا، ئاسانە كە دەنگۆ و زانیاریی نادروست بڵاوببێتەوە. ركابەریی دامەزراوە میدیاییەكان زۆر جار لەجیاتی ئەوەی كە ناڕوونییەكان روون بكەنەوە، دەبنە هۆی سەرلێتێكدان. دەبێت بەڕوونی بڵێم؛ كە هیچ كەسێك و هیچ گرووپێكی میلیشیایی لە سەرووی یاساوە نییە. چارەنووسی ئەو كەسانەی كە ئەو ئاسایش و سەقامگیرییەی كە قوربانییەكی زۆرمان لە پێناویدا داوە، دەخەنە مەترسییەوە، دەبێت لە رێگەی پرۆسەی یاسایی و دیموكراسییەوە بڕیاری لێبدرێت، نەك لە رێگەی مەزەندەكردن و بانگەشەی میدیایی.

ئاسایش، وەك دامەزراوەیەكی ئەمنیی یاسایی حكومەتی هەرێمی كوردستان، سەبارەت بە رووداوەكە راپۆرتی خۆی بۆ رای گشتی بڵاوكردووەتەوە، كە تێیدا زانیارییەكانی بە تەواوی باسكردووە، كە ئەركی هەموومانە رێگە بە دەسەڵاتی دادوەری بدەین، بەبێ هیچ دەستتێوەردانێك بەردەوام بن لە كارەكانی خۆیان.

هەربۆیە داوام لە هەموو دامەزراوە میدیاییەكانی سەر بە حزبەكەمان كردووە، هیچ جۆرە بەرپەرچدانەوەیەكیان نەبێت بۆ گەورەكردنی ئەو بانگەشە بێبنەمایانەی كە میدیاكانی دیكە بڵاوی دەكەنەوە. ئێمە خۆمان بۆ ئاستێكی وا دانابەزێنین، ئەركی ئێوە ئەوەیە كە بەرپرسیارانە راستییەكان بخەنەڕوو و متمانەی گشتی بپارێزن. دەبێت پێشینەی كارەكانمان پاراستنی ژیان و مافی هاووڵاتیانمان بێت، پارێزگاریی لە سەروەریی یاسا و رێگریی لەو كەسانە بكەین كە پشت بە هێز و تۆقاندن دەبەستن، نەك متمانەی گشتی.

داوا لە دەسەڵاتی دادوەریی دەكەین، ئەركی خۆیان بە پابەندبوون بە یاسا جێبەجێ بكەن و دادپەروەر و شەفاف بن، لە هەمانكاتدا دڵنیاببنەوە لەوەی كە مافی هەموو تاكێك پارێزراوە. نابێت كاری گرووپێكی میلیشیایی زاڵ بێت بەسەر ویستی هاونیشتمانیان بۆ ئاشتی، یەكڕیزیی و دیموكراسی.

بافڵ جەلال تاڵەبانی
سەرۆكی یەكێتیی نیشتمانیی كوردستان