راچڵەكین -

لەشاری بەغدا مامۆستایەكی ئایینی بەهۆی هێرشكردنەسەری لەلایەن كەسێكەوە، گیانی لەدەستدا، دیوانی وەقفی سوننیش رایدەگەیەنێت، تاوانبارن دەستگیركراون.

ئەمڕۆ هەینی 12-9-2025، مامۆستایەكی ئایینی بەناوی شێخ عەبدولستار قەرەغولی، كە پَشنوێژ و وتارخوێنی مزگەوتی كەریم ناسڕە لە ناوچەی دۆرەی باشووری بەغدا، لەناو مزگەوتەكە لەلایەن چەند كەسێكەوە هێرشی كرایەسەر و بەهۆیەوە گیانی لەدەستدا.

دیوانی وەقفی سوننی لە راگەیەندراوێكدا، رووداوەكەی بە كردەوەیەكی تاوانكاری وەسفكرد و رایگەیاند: تاوانبارن لەلایەن هێزە ئەمنییەكانەوە دەستگیركراون و رادەستی یاسا دەكرێن بەمەبەستی وەرگرتنی سزای تاوانەكەیان.

سەرچاوەیەكی ئەمنیی بەغدا لەبارەی رووداوەكە رایگەیاندووە، ئەو مامۆستا ئاینییە نەكوژراوە، بەڵكو بەهۆی هێرشكردنە سەری، تووشی جەڵتەی دڵ بووە و بەو هۆیەوە گیانی لەدەستداوە.

سەرچاوە ئەمنییەكە ئاشكرایكردووە، رووداوەكە بەهۆی ناكۆكیی بووە لەسەر پێشنوێژیكردن لەو مزگەوتە، پێشتر مامۆستایەكی ئاینیی وتارخوێن و پێشنوێژی مزگەوتەكە بووە، بەڵام لەلایەن ئەوقافی بەغداوە دوورخراوەتەوە، نوێژخوێنانی مزگەتەكەش قبوڵیان نەكردووە شێخ عەبدولستار قەرەغولی لەشوێنی وتارخوێن و پێشنوێژە دوورخراوەكە دەستبەكاربێت، هەربۆیە ئەمڕۆ هێرشیان كردووتە سەری لێیان داوە.

تائێستاش پۆلیسی بەغدا بەفەرمی هیچ روونكردنەوەیەكی لەبارەی رووداوەكە بڵاونەكردووەتەوە.