راچڵەكین-
وەزارەتی دارایی و ئابووری حكومەتی هەرێمی كوردستان رایدەگەیەنێت، رێوشوێنی پێویست بەرامبەر بانكی بانكی بازرگانی عيراقی ( TBI ) دەگرنە بەرامبەر، بەهۆی ئەو كێشانەی ڕووبەڕووی ئەو فەرمانبەرانە بوونەتەوە كەلەو بانكە ناوی خۆیان تۆماركردووەو مووچە وەردەگرن.
رۆژی سێشەممە 27ی كانوونی دووەمی 2026 وەزارەتی دارایی و ئابووری بڵاویكردەوە، لەماوەی ڕابردوودا، بانكی بازرگانی عیراقی ( TBI ) چەندین كێشەی هەبووە لەوانە كێشەی تەكنیكی بەردەوام و دانەنانی ئامێری ڕاكێشانی پارە لە قەزا و ناحیە و ئیدارە سەربەخۆكان و نەبوونی سەنتەری پەیوەندیكردن و كەمی ئامێری ڕاكێشانی پارە لە سەنتەری پارێزگاكان و درەنگ پڕكردنەوەی ئامێرەكانی ڕاكێشانی پارە.
ئەوەش وایكردووە، بەشێكی زۆری ئەو فەرمانبەرانەی لەو بانكە ناوی خۆیان تۆمار كردبوو لە ئێستادا بەشێوەی ئارەزومەندانە دەگوازرێنەوە سەر بانكی دڵخوازی دووەمی خۆیان.
وەزارەتی دارایی و ئابووری لەبەشێكی تری راگەیەندراوەكەیدا جەختی لەوەكردووە، لەبەرامبەر ئەو كێشانەدا ئیجرائاتی پێویست لەگەڵ بانكی بازرگانی عیراقی ( TBI ) دەكرێت:" هەر بانكێكیش توشی سزا و سنوورداركردنی خزمەتگوزارییەكان ببێتەوە لە پڕۆژەكە دور دەخرێتەوە، ئەم هەنگاوانەش هەر بانكێك دەگرێتەوە كە پابەند نەبێت بە ڕێنماییەكان و نەتوانێت باشترین خزمەتگوزاری پێشكەش بە مووچەخۆران بكات."