راچڵەکین-

فەرمانگەی میدیا و زانیاریی حکومەتی هەرێمی کوردستان لە راگەیەندراوێکدا روونیکردەوە، لەپێناو گەیاندنی پەیامێکی پیشەیی و نیشاندانی تاوانە مرۆییەکان لە هەرێمی کوردستان بە جیهان، ڕێککار و ڕێنوێنی بۆ ڕووماڵکردنی شوێنە زیانلێکەوتووەکانی سڤیل بڵاو دەکەنەوە.

 

دەقی راگەیەندراوەکەی فەرمانگەی میدیا و زانیاری:

لەپێناو گەیاندنی پەیامێکی پرۆفیشناڵ بە جیهان، داوا لە هەموو دەزگاکانی ڕاگەیاندن و ماڵپەڕە هەواڵییەکان دەکات کە ئارەزووی ڕووماڵکردنی شوێنە زیانلێکەوتووەکانی سڤیڵ دەکەن، پێویستە لە فەرمانگەی میدیا و زانیاری، ناوی تیمەکانیان تۆمار بکەن، هەروەها هەموو دەزگاکانی ڕاگەیاندن، پێشوەختە لە کات و شوێنی ڕووماڵکردنی مەیدانی ئاگادار دەکرێنەوە، ئەمەش تەنها لە ڕێگەی هەماهەنگی ڕاستەوخۆ لەگەڵ فەرمانگەی میدیا و زانیاری دەبێت.

پابەندنەبوون بەم پرۆتۆکۆڵە، ناچارییە و مەرجی سەرەکییە بۆ ڕێگەپێدانی ڕووماڵکردن:

بە مرۆیی کردنی پەیامەکە: پێویستە ڕۆژنامەنووسان جەخت بکەنەوە لەسەر چیرۆکی کەسی قوربانییەکان و وێرانکردنی موڵک و ماڵی تایبەت. پێویستە ڕەهەندی تاوانکاریی ئەم هێرشانە وەک تاوانێکی نێودەوڵەتی نیشان بدریت.

وێنەگرتنی سنووردار: وێنەگرتن لە شوێنی بەرز یان بەکارهێنانی وێنەی پان (Wide Shots) کە شوێنی جوگرافی بە وردی دیاری بکات، بە هەموو شێوەیەک قەدەغەیە. هەروەها بەکارهێنانی درۆن بۆ وێنەگرتن قەدەغەیە.

ناوچە قەدەغەکراوەکان: وێنەگرتنی چاڵی تەقینەوە، پاشماوەی مووشەک یان درۆنەکان لە نزیکەوە قەدەغەیە، نەیاران ئەم وێنانە بۆ دیاریکردنی جۆری چەک و گۆشەی هێرشەکە بەکاردەهێنن.

یاوەریی ناچاری: پێویستە تەنها لە چوارچێوەی ئەو "ڕێڕەوە دیاریکراوانەدا" بن کە لەلایەن تیمە ئەمنییەکانەوە دیاری دەکرێن بە هەماهەنگی فەرمانگە.

وتاری یەکگرتوو: پێویستە پەیامنێرەکان پەیامی مرۆیی بەرجەستە بکەن بۆ پێشکەشکردنی گوتارێکی میدیایی یەکگرتوو و ورد بەرامبەر جیهان.

دەرهاوێشتە یاساییەکان: هەر سەرپێچییەک لەم ڕێنماییانە، کەسەکە و دەزگاکە ڕووبەڕووی لێپێچینەوەی یاسایی دەستبەجێ دەکاتەوە بەپێی ڕاگەیەندراوی ئەنجومەنی ئاسایش لە ١٣ی ئاداری ٢٠٢٦.

تێبینی:
نوێنەری دەزگاکان، پێویستە سەردانی فەرمانگەی میدیا و زانیاری بکەن لە ڕێکەوتی ٢٩ی ئازار لە کاتژمێر ١٠ بە بەیانی تا ١ی دوای نیوەڕۆ.
پێویستە نوێنەری دەزگاکان، نووسراوی پشتگیریی کارکردن لە دەزگاکە، لەگەڵ خۆیان بهێنن.