راچڵەکین-
دۆناڵد ترەمپ، سەرۆکی ئەمریکا ڕایگەیاند: تاکە هۆکار کە وای کردووە ئێران سوور بێت لەسەر داخستنی گەرووی هورمز، تەنها پاراستنی ڕووی خۆیەتی لەبەردەم جیهاندا، چونکە لە ڕاستیدا ئەمریکا گەرووەکەی بە تەواوی گەمارۆ داوە.

ئاماژەی بەوەشکرد: بەهۆی گەمارۆدانی گەرووی هورمزەوە، ئێران ڕۆژانە 500 ملیۆن دۆلار زیانی پێ دەگات و ئێستا ئەو وڵاتە لەناو کارەساتێکی ئابووریدایە و وێران بووە.
سەرۆکی ئەمریکا لە کاردانەوەی بەرامبەر وتارێکی ڕۆژنامەی وۆڵ ستریت جورناڵ کە تێیدا هاتبوو ئێرانییەکان ترەمپ بە "گەمژە" دەزانن، نووسیویەتی: ئێران بۆ ماوەی 47 ساڵ خەڵکی ئێمە و زۆر کەسی تری کوشتووە و لە هەموو سەرۆکەکانی پێش من ئیمتیازی وەرگرتووە، جگە لە من.
وتیشی: هێزی دەریایی ئێران چووەتە بنکی دەریا و هێزی ئاسمانییان تێکشکێنراوە، هەروەها ڕادار و سیستەمە دژە موشەکییەکانیان لەناوبراون و تاقیگە ئەتۆمییەکانیشیان بە بۆمبهاوێژی "B-2" خاپوور کراون.
روونیشیکردەوە: چەند رۆژێک پێش ئێستا چەند کەسێک پێیان وتم کە ئێران دەوێت دەستبەجێ گەرووەکە بکاتەوە، بەڵام  من پێموایە ئەگەر ئێستا ئەو کارە بکەین، هەرگیز ناتوانرێت ڕێککەوتن لەگەڵ ئێراندا بکرێت.