راچڵەكین-

رێبەری زیندانیكراوی پارتی كرێكارانی كوردستان دەڵێت، یەكێك لە كێشەكانی كورد، نەبوونی یەكێتییە، بۆیە یەكێتی دیموكراتیك پێویستییەكی ناچاری مێژووییە.

عەبدوڵڵا ئۆجەلان، رێبەری زیندانیكراوی پارتی كرێكارانی كوردستان (پەكەكە) لە پەیامێكی نوێدا كە لە كۆنفرانسی دەستپێشخەریی یەكێتیی دیموكراتی لە شاری ئامەدی باكووری كوردستان خوێندرایەوە ئاماژەی بەوەكردووە:"  لەو شوێنانەی كورد لێی دەژین، چۆن لەگەڵ نەتەوە-دەوڵەتەكان بەدوای چارەسەری دیموكراتیدا دەگەڕێن، دەبێت لەناوخۆی خۆشیاندا سیاسەتی دیموكراتی پێش بخەن."

دەقی نامەكەی ئۆجەلان:
 
بەشداربووانی هێژا

درێژەدان بە هەبوونی گەلێك، ڕاستەوخۆ گرێدراوە بە هێزی گۆڕانكاریی بە گوێرەی سەردەم، هەر بونیادێكی كۆمەڵایەتی كە نەتوانێت دینامیكی ناوخۆیی خۆی بگۆڕێت و لەسەر بنەمایەكی دیموكراتیك بنیاتی بنێتەوە، ناتوانێت درێژە بە مانەوەی بدات.

گەلی كورد بەهۆی سیاسەتی نكۆڵی و لە ناوبردن و فشارەوە كە ساڵانێكە بەردەوامە، بێبەشبووە؛ لە بەدیهێنانی ئەم گۆڕانكارییە بەشێوەیەكی سرووشتی، پرسی سەرەكی بەردەممان لە ئێستادا ئەوەیە؛ ئایا كۆمەڵگەی كوردی چۆن دەگاتە ئاستی كۆمەڵگەیەكی هاوچەرخ.

كورد بە مێژوو و زمان و كەلتوور و شێوەگرتنە كۆمەڵایەتییەكەی، ڕاستینەیەكە و كاتێك لە بوارەكانی سیاسەت و ئابووری و تەندروستی و كلتووری، توانی پێشەنگایەتی خۆی بكات، ئیتر دەتوانێ درێژە بەم ڕاستینەیەی بدات، ئەمەش تەنها بە ڕێكخستنێكی بەهێزی سیاسی و كۆمەڵایەتی دێتەدی.

كۆمەڵگەیەكی دیموكراتیك، پێویستی بە بنیاتنانێكی هۆشمەندانەیە و ئەم بنیاتنانە بە توندوتیژی و فشار نایەتەدی، بە ڕێكخستنێكی كۆمەڵایەتی فرەلایەن لەسەر بناغەی سیاسەتی دیموكراتیك و یاسا، ڕێی تێدەچێت، بناغەی ئەم پڕۆسەیەش، سەرلەنوێ هەڵسەنگاندنەوەی بە كۆمەڵگەبوون و ئابووری و كلتوور و زمان و مێژووە، بەگوێرەی بنەما دیموكراتیكەكان، دیموكراسی تەنها لە شوێنێكی خاڵی لە زۆرەملێ و فشاردا، دەژی.

بۆیە كورد، ناچارن بونیادی نوێی خۆیان، نەك تەنها بەرانبەر دەرەوە، بەڵكو لە پەیوەندییە نێوخۆییەكانیشدا، بەگوێرەی ئەم بنەما دیموكراتیكییانە دابڕێژنەوە، پێویستە لە پەیوەندیی لەگەڵ دەوڵەت-نەتەوەكاندا، چارەسەری دیموكراتیك و دانوستان بەبنەما بگرین، لە پەیوەندییە نێوخۆییەكانیشدا، لە بری توندوتیژی، سیاسەتی دیموكراتیك و یاسا بەبنەما بگرین، ڕێگەی یەكێتی دیموكراتیك، بە دانوستانی دیموكراتیكدا تێدەپەڕێت.

یەكێك لە پرسە سەرەكییەكانی گەلی كورد، پرسی یەكێتییە، بۆیە یەكێتیی دیموكراتیك، ناچارییەكی مێژووییە، بۆ دەركەوتنی عەقڵ و ئیرادەی هاوبەش، بەستنی كۆنگرەی یەكێتیی دیموكراتیكی بەرفراوان، بەرپرسیارێتییەكی هەنوكەییە، كورد لەو وڵاتانەی تێیدا دەژین و ڕێگەی دانوستانی دیموكراتیك دەگرنەبەر بۆ دۆزینەوەی چارەسەر، پێویستە بۆ پرسە نێوخۆییەكانیش هەمان ڕێباز پەیڕەو بكەن.

بەڵام سیستەمی پەیوەندییە تەنگەكانی عەشیرەت و هۆز و پەیوەندییە تەنگەكانی تر، كۆمەڵگە دابەش دەكەن، دەبنە بەربەستێكی گەورە لەبەردەم پڕۆسەكەدا، ئەم زیهنیەتەی تەونی كۆمەڵایەتی لاوازكردووەو ڕێگەی بۆ لێكهەڵوەشانی گەورە خۆشكردووە، تا ڕووبەڕووی ئەم ڕاستییە نەبینەوە، بنیاتنانی یەكێتیی دیموكراتیك، مەحاڵە.

بنیاتنانی ژینگەیەكی كۆمەڵایەتیی كە شەڕە نێوخۆییەكانی تێپەڕاندووە، پشت بە ڕێزگرتنی هاوبەشی لایەنەكان دەبەستێت، ڕێی تێدەچێت، ئەمەش پێویستی بەوەیە، لە هەموو بوارەكاندا، بنەما دیموكراتیكەكان بە بنەما بگیرێت، ئەركی سەرەكیی ئەم قۆناغەمان ئەوەیە، هەنگاو بە هەنگاو ئەم زیهنیەتە لە پێكهاتە سیاسییەكان و تەواوی كۆمەڵگەدا هەڵبوەشێنینەوە.

ئەم قۆناغەی بەردەممان، بۆ گەلی كورد قۆناغی سەرلەنوێ بنیاتنانەوەیە، بناغەی ئەم بنیاتنانەش یەكێتیی دیموكراتیك و سیاسەتی دیموكراتیك و دانوستانی دیموكراتیكە، هەر هەنگاوێك لەسەر ئەم بناغەیە بنرێت، ئاییندەی هاوبەشمان بنیات دەنێت.

سڵاو و ڕێز بۆ هەمووتان دەنێرم
عەبدوڵا ئۆجالان
ئیمراڵی