راچڵەكین-
بەڕێوەبەرایەتی گشتی پۆلیسی دارستان و ژینگەی سلێمانی پەیامێك ئاڕاستەی ئەو هاوڵاتییانە دەكات كە دەچنە دەشتو دەر بۆ بەسەربردنی كاتێكی خۆش، پێویستە ژینگە بپارێزن و پاشماوە بەتایبەت ئاگر لەدوای خۆیان جێنەهێڵن.
رۆژی هەیینی 26ی حوزەیرانی 2026 بەڕێوەبەرایەتی پۆلیسی دارستان و ژینگەی سلێمانیی لەراگەیەندراوێكدا ئاماژەی بەوەكردووە، بەهۆی هاتنی وەرزی هاوین و زۆری گژوگیای ئەمساڵ، مەترسی كەوتنەوەی ئاگر لە دارستان و پاوانەكانمان گەیشتووەتە ئاستێكی هەستیار.
پۆلیسی دارستان و ژینگەی سلێمانیی داوایكردووە لە كاتی گەشت و سەیرانەكانتاندا ڕەچاوی ئەم خاڵانە بكرێت:
١- ئاگركردنەوە: تكایە ئاگر لە شوێنی كراوە و پارێزراودا بكەنەوە، و بە هیچ شێوەیەك ئاگر لە نزیك گژوگیای وشك و نێو دارستانەكان مەكەنەوە.
٢- كوژاندنەوەی یەكجاری: پێش جێهێشتنی شوێنەكانتان، بە تەواوی دڵنیاببنەوە لە كوژاندنەوەی ئاگرەكان بە بەكارهێنانی ئاو یان خۆڵ تا هیچ پشكۆیەك جێ نەمێنێت.
٣- پاك ڕاگرتنی ژینگە: فڕێدانی پاشماوەی شووشە و جگەرە دەبێتە هۆی كۆكردنەوەی تیشكی خۆر و دروستبوونی ئاگری گەورە و لەناوبردنی ڕووبەرێكی فراوانی سەوزایی، تكایە ژینگە پاك ڕابگرن.
پۆلیسی دارستان و ژینگەی سلێمانی داوا لەهاوڵاتییان دەكات لە ئەگەری بینینی هەر حاڵەتێكی ئاگركەوتنەوە یان سەرپێچییەك، تكایە دەستبەجێ پەیوەندی بە لایەنی پەیوەندیدارەوە بكەن بۆ ئەوەی بە زووترین كات ڕێگری لە كارەساتە ژینگەییەكان بكرێت.