راچڵەكین-
كۆمەڵەی پزیشكانی نەشتەرگەری میزەڕۆی كوردستان رایدەگەیەنێت، گواستنەوە و چاندنی گون لەرووی زانستییەوە هیچ بنەمایەكی نییەو لە ھیچ جێ یەكی دونیا ئەنجام نادرێت.
كۆمەڵەی پزیشكانی نەشتەرگەری میزەڕۆی كوردستان لەروونكردنەوەیەكدا كە ئەمڕۆ سێشەممە بڵاوكراوەتەوە ئاماژەی بەوەكردووە:" لە رۆژانی رابوردوو راپۆرتێك لە یەكێك لە كەناڵەكانەوە پیشان درا دەربارەی نەشتەرگەری و چاندنی ئەندامەكانی جەستەی مرۆڤ وە باسی گواستنەوە و چاندنی گون كرا لە كەسێكەوە بۆ كەسێكی تر ، ئێمە بۆ رای گشتی رای دەگەیەنین كە ئەم بابەتە لە رووی زانستی یەوە دوور و نزیك ھیچ بنچینەیەكی نیە و پێمان سەیرە ئەم ھەواڵانە لە كوێ وە سەرچاوە ئەگرن و بۆ چی مەرامێك بڵاو ئەكرێنەوە."
ئەوەش روونكراوەتەوە:"بۆ ئاگاداری ھەموو لایەك، ئەم نەشتەرگەری یە لە ھیچ جێیەكی دونیا ئەنجام نادرێت چونكە بە پێی یاسا و ئایین قەدەغە و تاوانێكی گەورەیە و لە رووی كرداری نەشتەرگەرییەوە زۆر زەحمەتە، ھەروەھا وەك راستكردنەوەیەك بۆ ھەڵەیەكی زانستی كە لە راپۆرتەكەدا باس كراوە ھیچ جیاوازیەك نییە لە نێوان گونی چەپ و راست دا لە ھیچ روویەكەوە."
كۆمەڵەی پزیشكانی نەشتەرگەری میزەڕۆی كوردستان داوا لە دەزگاكانی راگەیاندن دەكات لە دانان و ئامادەكردنی ھەر ھەوال و راپۆرتێكی پزیشكی، پەیوەندی بە لایەنی تایبەتمەندی ئەم بابەتە بكرێت پێش بڵاوكردنەوەی چونكە ناشیرینكردنی وێنەی كاری پزیشكی لە كوردستان خزمەت بەھیچ لایەك ناكات."