فەرماندەیی هێزەكانی 70 روونكردنەوەیەك بڵاودەكاتەوە

کوردستان

2 رۆژ پێش ئێستا     ژمارەی بینراو 639

راچڵەكین -

راگەیاندنی فەرماندەیی هێزەكانی 70 روونكردنەوەیەك سەبارەت بە هاككردنی پەڕەی فەرمییان لە تۆڕی كۆمەڵاتی فەیسبوك، بڵاودەكاتەوەو رایدەگەیەنێت: دەستێكی رەش و دژ و  ناحەز بە نیشتیمان و ‌هێزی پێشمەرگە،‌ كە گومان دەكرێت نەیاری ناوخۆی یەكێتی بێت،‌ دزەیانكردە ناو پەڕەی فەرمی هێزەكانی 70 لە تۆڕی كۆمەڵاتی فەیسبوك و دەستیان بەسەردا گرت.

فەرماندەیی هێزەكانی 70 لەو روونكردنەوەیەدا كە ئەمڕۆ هەینی 4-7-2025 بڵاویكردووەتەوە، ئاماژەی بەوەكردووە، توانرا لە ماوەیەكی كەمدا دووبارە پەیجەكە بەدەست بهێنینەوە، رێكاری یاسایی و پێویستیش دەگيرێتەبەر بۆ لێپێچینەوە لەو "كار و تاوانە".

دەقی روونكردنەوەكە:

بەداخەوە لەماوەی چەند هەفتەی رابردوودا، دەستێكی رەش و دژ و  ناحەز به نیشتیمان و ‌هێزی پێشمەرگه،‌ كە گومان دەكرێت نەیاری ناوخۆی  یەكێتی نیشتیمانی بێت، هەستان به هاككردن و‌ دزەكردنە ناو پەڕەی رەسمی هێزەكانی 70 لە تۆڕی كۆمەڵاتی فەیسبوك و دەست بەسەرداگرتنی،  بە ئامانجی دژایەتكردن و شاردنەوەی  ئەو پێشكەوتنە بەرچاوەی هێزەكانی 70ی پێشمەرگە لەماوەی رابردوودا بەدەستی هێناوە، چی لەرووی مەشق و راهێنان و توانای سەربازی و چاكسازی و خۆڕێكخستنەوە، چی لەرووی فراوان بوونی هاوكاری و پەیوەندییەكان بەتایبەت لەگەڵ هاوپەیمانان.

بەڵام خۆشبەختانه،‌ توانرا لە ماوەیەكی كەمدا و بەهەوڵ و هیمەتی دڵسۆزانە و پێشمەرگە ئاسایانەی هاوڕێ و هاوكارانمان دووبارە پەیجەكە بەدەست بهێنینەوە، ئێستا پەیجەكە بەتەواوی لەژێر كۆنترۆڵدایە، لەهەمان كاتدا رێكاری یاسایی و پێویستیش دەگیرێتەبەر بۆ لێپێچینەوە لەو كار و تاوانە.

هێزی پێشمەرگەی كوردستان، سمبوڵ و هێمای بەرخۆدان و تێكۆشان  و ئازادی و سەربەستی خەڵكی كوردستانەو پارێزەری خاكی پیرۆزی كوردستانه ‌و  خاوەنی هەزاران داستان و قوربانی و شەهیدی سەربەرزە، ئەم پێگەیەش دوور لەهەر ئامانجێكی سیاسی لەهەوڵی خزمەتكردنی ئەم هێزە دڵسۆز و تێكۆشەره ‌و كۆڵنەدەرەیە بۆیە خۆی لە خۆیدا دەست بردن بۆ ئەم كارە گەورەترین تاوان و هەڵە كە كراوە و قابیلی لێ خۆش بوون نییە.

‌روونیشی دەكەینەوه،‌ لێرە بەدواوە پەیجەكەمان دووبارە بە هێزو گۆڕێكی تر و بە تەكنیكی باشتر و پێشكەوتووتر بەردەوام دەبێت لە بڵاوكردنەوەی بابەتەكانی بۆ خزمەتكردنی هێزی پێشمەرگەی كوردستان و خستنەڕووی ئەو پێشكەوتن و دەستكەوتانەی  هێزەكانی 70 رۆژ بەرۆژ بەدەستی دەهێنێت و پێی دەگات.

سوپاس بۆ هەموو ئەو پێشمەرگەو كەس و لایەن و هاووڵاتیانەی نیگەران بوون بەو رووداوە، سوپاس و دەستخۆشی گەرممان  هەیە بۆ هەركەسێك كە  پشتیوانی و پشگیری لەچالاكییەكانمان دەكات بۆ گەیاندنی دەنگ و رەنگی پێشمەرگە بە هەموو لایەك .

راگەیاندنی فەرماندەیی هێزەكانی 70

داگرتنی ئەپی راچڵەکین بۆ ئەندرۆید

داگرتنی ئەپی راچڵەکین بۆ ئایفۆن