راچڵەكین-
سەرۆكی ئەنجوومەنی نوێنەرانی عیراق داوای ئەنجامدانی دانیشتنێكی نائاسایی دەكات، بۆ هەڵوەشاندنەوەی ئەنجوومەنەكەو دەستكردن بەرێوشوێنەكانی ئەنجامدانی هەڵبژاردنی پێشوەختە.
محەمەد حەلوبسی، لە دوو جریوەدا نوسیوویەتی:" حكومەتە یەك لەدوای یەكەكانی عیراق ئەو بەرنامەیەیان جێبەجێنەكردوە كە بەڵێ،یان پێداوەو بەڵێنەكان لەچەند دێرێكی نووسراو تێپەریان نەكردووە، ئەوەش وایكردووە ناڕەزایەتییەكان بەهۆی كەمی خزمەتگوزاریەكان و ژیانێكی شایستە بەردەوام بن."
دەشڵێت:" لەپێناو عیراق و قوربانیدانی رۆڵەكانی، داوای هەڵبژاردن دەكەین پێشتر لەو وادەیەی دەستنیشانكراوە، لەگەڵ ئەنجامدانی دانیشتنێكی نائاسایی كراوە بەئامادەبوونی سەرۆكایەتییەكان، بەئامانجی جێبەجێكردنی رێكارەدەستورییەكان بەپێی ماددەی 64ی دەستوور."
حەلبوسی، دەڵێت:" پێویستە لەو دانیشتنەدا لەسەر داوای سێیەكی ئەندامانی ئەنجوومەنی نوێنەرانی عیراق و بەدەنگی رەها، ئەنجوومەنەكە هەڵبوەشێنرێتەوە، یاخود داوا لەسەرۆكی ئەنجوومەن بكرێت و سەرۆككۆماری عیراق رەزامەندی لەسەر نیشان بدات."
ئاماژەی بەوەشكردووە:" دوای ئەوە سەرۆككۆمار داوای هەڵبژاردنی گشتی دەكات لەماوەی 60 رۆژ لەدوای هەڵوەشاندنەوەی ئەنجوومەنی نوێنەرانی عیراق، لەو ماوەیەشدا ئەنجوومەنی وەزیران بەدەستلەكاركێشاوە ئەژمار دەكرێت و دەبێتە حكومەتێكی كار بەرێكەر."
ئەو داوایەی محەمەد حەلبوسی لەكاتێدا دێت، شەوی رابردوو، مستەفا كازمی- سەركۆوەزیرانی عیراق رایگەیاند:" رۆژی ٦-٦-٢٠٢١، هەڵبژاردنی پێشوەختە لە عێراق ئەنجامدەدرێت, داواشی لەهاوڵاتیان كرد هاوكاریی ئەو پرۆسەیە بن و بەو هەڵبژاردنە گۆڕانكاری باش لە وڵاتدا بكەن، داواشی لە پەرلەمانی وڵاتەكەی كرد كە بە زووترین كات یاسای نوێی ھەڵبژاردن پەسەند بكات".