نیشانه و هۆكاره‌كانی توشبوون به تای ماڵتا و چۆنیه‌تی چاره‌سه‌ر
ڕاچڵه‌كین-
ئه‌م نه‌خۆشییه جۆرەهەوکردنێکی بەکتریاییە کە لە ئاژەڵەوە بۆ مرۆڤ دەگوازرێتەوە، چەند تیرەیەکی ھەیە کە لە مانگا و بزن و مەڕ وسەگ و بەرازدا بینراوە، بەزۆری توشی ئەو کەسانە دەبێت کە بەرهەمە شیریە نەکوڵینراوەکان دەخۆن، وە لە هەندێک باردا ئەم بەکتریایە لە رێگای هەوا یان بەرکەوتنی راستەوخۆی ئاژەڵێکی توشبوو بۆ مرۆڤ دەگوازرێتەوە، دكتۆر هه‌رێم پزیشكی پسپۆڕی هه‌ناوی له‌م بابه‌ته‌دا هۆكار و نیشانه و چۆنیه‌تی چاره‌سه‌ری ئه‌م نه‌خۆشییه ده‌خاته ڕوو.
نیشانەکانی تای ماڵتا :
1- لەرز و تا بەتایبەت تای دوای نیوەڕۆیان
2- نەمانی ئارەزووی خواردن
3- ئارەقکردنەوە
4- ماندوویی و بێهێزی
5- ئازاری جومگە و ماسولکەکان
6- سەرئێشە
7-ھەندێ جار کۆکە و سک یەشە
لە نیشانە درێژخایەنەکانی نەخۆشیەکە
1- هەوکردنی جومگەکان
2- هەوکردنی دڵ
3- هەوکردنی بربرەکانی پشت
ڕێگەکانی گواستنەوەی نەخۆشیی تای ماڵتا چین؟
1- خواردنی بەرهەمە شیریە نەکوڵێنراوەکان و گۆشتی ئاژەڵی توشبوو: ئەو بەکتریایەی کە هۆکارە بۆ توشبوون بە تای ماڵتا لە شیری نەکوڵاو ئەو ئاژەڵانەدا هەیە کە توشی ئەم نەخۆشییە بوون، هەروەها ئەم بەکتریایە لە گۆشتی ئاژەڵی توشبووشدا هەیە، بۆیە لە کاتی خواردنی گۆشتی ئاژەڵی توشبوودا ئەگەر باش نەکوڵێنرێت دەگوازرێتەوە بۆ مرۆڤ و توشی نەخۆشیی تای ماڵتای دەکات.
2- هەوا: ئەم بەکتریایە زۆر دەگمەن توانای گواستنەوەی هەیە بە هەوادا، بەتایبەتی لەو شوێنانەی کە ئەگەری بڵاوبوونەوەی نەخۆشییەکەی تێدا زۆرە وەک: کێڵگەکان، شوێنی سەربڕینی ئاژەڵەکان، کلینیکی پزیشکی ئاژەڵان و هەروەها تاقیگە پزیشکییەکان.
3- دەست لێدانی خوێن و شلەی لەشی ئاژەڵی توشبوو: ئەم بەکتریایە لە خوێن و شلەی لەشی گیانەوەری توشبوودا هەیە. لەوانەیە بۆ مرۆڤ بگوازرێتەوە و بچێتە ناو خوێنەوە لە رێگای بڕین یان برینێکی لەشی کەسەکەوە، واتە لە رێگای بەرکەوتنی ئاسایی وەک دەستلێدان یان یاریکردن ناگوازرێتەوە. بەڵام ئەو کەسانەی کە بەرگریان لاوازە پێویستە دوورکەونەوە لە دەستلێدان و یاریکردنیش لەگەڵ ئاژەڵەکاندا.
4- لەدایکەوە بۆ کۆرپەلە: هەندێک جار تای ماڵتا لە دایکی توشبوو دەگوازرێتەوە بۆ کۆرپەلە لە ماوەی دووگیانیدا یان لەکاتی شیرپێداندا.
تا ماڵتا بەشێوەیەکی گشتی لە کەسێکەوە بۆ کەسێکی تر ناگوازرێیەوە، وە بەشێوەیەکی دەگمەن لە رێگای سێکس یان چاندنی مۆخی سوری ئێسک دەگوازرێتەوە.
ڕێگاکانی خۆپارێزی چین؟
1- کوڵاندنی بەرهەمە شیریەمەنیەکان پێش خواردنیان.
2- کوڵاندنی گۆشت تا نزیکی ٦٣ بۆ ٧٤ پلەی سیلیزی.
3- بەکارهێنانی دەستەوانە لە کاتی بەرکەوتن لەگەڵ ئاژەڵدا، بەتایبەتی ئەگەر پزیشکی ڤێتەرنەری، شوان یان گۆشتفرۆش بیت.
4- ڕەچاوکردنی گشت ڕێنمایە تەندروستیەکان بەتایبەتی لەو شوێنانەی کە نەخۆشییەکەیان تێدا بڵاوە، بۆ نموونە ئەگەر کارمەندی تاقیگەی هەموو نموونەکان لە شوێنێکی پارێزراو هەڵگرە، وە ئەگەر گۆشتفرۆشێ هەوڵبدە شوێنەکەت پاکوخاوێن بێت و جلوبەرگی تایبەتیشت لەبەردا بێت.
5- کوتانی ئاژەڵە ماڵییەکان بۆ رێگەگرتن لە توشبوون بەم نەخۆشیە.
چارەسەر :
لە ڕێگەی بەکارھێنانی چەند جۆرێک دژە بەکتریا ،بە گشتی ریفامپسین و دۆکسیدار بۆ ماوەی ٦—٨ ھەفتە.