راچڵەكین-
بە نزیكەی بڕی ٤٠٠ ملیۆن یۆرۆ هاریكاری بەپەلەی ئەو ناوچانە دەكرێت كە لە ئاكامی روودانی لافاو لەویلایەتەكانی راینلاند-پلاز و باكووری راین ڤێستفالنی رۆژئاوای ئەڵمانیا زیانیان پێگەیشتووە.
ئۆلاف شۆڵز، وەزیری دارایی ئەڵمانیا، رایگەیاند لافەوەكەی ئەو وڵاتە زیانی زۆریا لێ كەوتووەتەوە و پێویستە بە خێرایی هاوكاری زیانلێكەوتووان بكرێت.
شۆڵز تیشكی خستە سەر ئەوەی كە لەم بارەیەوە هەنگاوی پێویستییان ناوە و وەك هەنگاوی یەكەمیش نزیكەی بڕی ٤٠٠ ملیۆن یۆرۆیان بۆ ئەم مەبەستە تەرخان كردووە.
ناوبراو ئاماژەی بەوەدا، نیوەی ئەم پارەیە لەلایەن حكومەتی فیدڕاڵی و نیوەكەی دیكەیشی لەلایەن ویلایەتەكانەوە بەمەبەستی نۆژەنكردنەوە و چاككردنەوەی باڵەخانە و ژێرخانەكان و هاوكاریكردنی ئەوانەی پێویستییان بە هاوكاری بەپەلەیە خەرج دەكرێت.
بەهۆی ئەو لافاوە بەرفراوانی ئەڵمانیای گرتەوە، لانیكەم ١٧١ كەس گیانیان لەدەستدا، هاوكات دەیانی تر برینداربوون و زیانێكی ماددی زۆریشی لێكەوتەوە.