راچڵەكین –
ئەنجومەنی وەزیرانی هەرێمی كوردستان، لە كۆبوونەوەی ئەمڕۆیدا، بەكۆی دەنگ (پلانی نیشتمانیی هەرێمی بۆ مافەكانی مرۆڤ 2021 - 2025) پەسندكردو جەختیشی كردەوە لەسەر زوو جێبەجێكردنی بڕیارەكانی تایبەت بە قەدەغەكردنی سیمكارتی بێ بەرایی و ئەنجامی لێكۆڵینەوە لە كوالیتی ئاردی هاوردەكردەكراو.
ئەمڕۆ چوارشەممە 15ی ئەیلوولی 2021، بە سەرۆكایەتی مەسرور بارزانی سەرۆكی ئەنجومەنی وەزیران و ئامادەبوونی قوباد تاڵەبانی جێگری سەرۆك وەزیران، ئەنجومەنی وەزیرانی هەرێمی كوردستان، كۆبوونەوەی هەفتانەی ئەنجامدا.
بەگوێرەی راگەیەندراوێكی فەرمانگەی میدیاو زانیاری، لە دەستپێكی كۆبوونەوەكەدا، سەرۆك وەزیران تیشكی خستەسەر ئامادەكارییەكانی هەڵبژاردنەكانی ئەنجومەنی نوێنەرانی عێراق و جەختی لەوە كردەوە، كە پێویستە هەڵمەتی بانگەشەی هەڵبژاردن، بە شێوەیەكی ئارام و مەدەنیانە و دوور لە ناوزڕاندن و یەكترشكاندن بەڕێوەبچێت. ئاماژەی بەوەش كرد كە ئەم هەڵبژاردنە، بۆ ئەوەیە نوێنەرانی هەرێمی كوردستان لە بەغدا، داكۆكی لە بەرژەوەندییە گشتییەكان و ماف و شایستەكانی خەڵكی كوردستان بكەن و پێویستە ململانێ و كێبەركێیی نێوان حزب و لایەنە كوردستانییەكانیش، بە ئاراستەی بەرگریكردن بێت لە پرسە نیشتمانییەكان و مافەكانی گەلی كوردستان.
ئەنجومەنی وەزیران جەختی لە گرنگیی ڕۆڵی بێ لایەنانەی دامودەزگا ئیداری و ئەمنییەكانی حكومەتی هەرێم و میدیا و ڕێكخراوەكانی كۆمەڵگەی مەدەنی كردەوە لە سەرخستنی پرۆسەی هەڵبژاردن بە گوێرەی یاسا بەركارەكان، بە شێوەیەك پێویستە ئامانجی سەرەكی هەموو حزب و لایەنە كوردستانییەكان ئەوە بێت، لە بەغدا بەیەكەوە داكۆكی لە مافە دەستوورییەكانی هەرێمی كوردستان و بەرژەوەندییە باڵاكانی خەڵك بكەن .
پاشان لە لایەن ڕێبەر ئەحمەد وەزیری ناوخۆو وەزیرە پەیوەندیدارەكان، هەنگاوەكانی جێبەجێكردنی چەند بڕیارێكی ئەنجومەنی وەزیران خرایەڕوو كە تایبەت بوون بە قەدەغەكردنی سیمكارتی بێ بەرایی و ئەنجامی لێكۆڵینەوە لە كوالیتی ئاردی هاوردەكردەكراو لە دەرەوەی هەرێمی كوردستان لە ڕووی خۆراكی و تەندروستییەوە. ئەنجومەنی وەزیران جەختی كردەوە لە زوو جێبەجێكردنی ئەو بڕیارانە.
بڕگەیەكی دیكەی كۆبوونەوەكە، تایبەت بوو بە بڕیاردان لە سەر ڕەشنووسی (پلانی نیشتمانیی هەرێمی بۆ مافەكانی مرۆڤ 2021 - 2025) كە لە كۆبوونەوەی پێشووی ئەنجومەن خرایەڕوو ، لە كۆبونەوەكەدا بە كۆی دەنگی ئەنجومەنی وەزیران پەسەند كرا و وەزارەت و لایەنە پەیوەندیدارەكان ڕاسپێردران، بۆ جێبەجێكردنی پلانەكە و ئاگاداركردنەوەی ئەنجومەنی وەزیران لە بەرەوپێشچوونی جێبەجێكردنی پلانەكە بە ئاراستەی برەودان بە مافەكانی مرۆڤ لە هەرێم.
لە كۆتایی كۆبوونەوەكەدا ، دانا عەبدولكەریم وەزیری ئاوەدانكردنەوە و نیشتەجێكردن ، ڕەشنووسی ( پەیڕەوی سندووقی پاڵپشتیی گەشەپێدان ڕێگاوبان لە هەرێمی كوردستان )ی خستەڕوو. ئەم ڕەشنووسە لەلایەن وەزارەتی ئاوەدانكردنەوە و نیشتەجێكردن بە هەماهەنگیی وەزارەتە پەیوەندیدارەكان ئامادەكراوە.
ئەنجومەنی وەزیران، سەرەڕای جەختكردنەوە لە گرنگیی برەودان بە بواری ڕێگاوبان، بڕیاریدا وەزارەتە پەیوەندیدارەكان لە ماوەی مانگێكدا، پێداچوونەوەی زیاتر بە ڕەشنووسەكەدا بكەن لە ڕووی قانونی و تەكنیكی وداراییەوە، لەبەر ڕۆشنایی ئەو تێبینی وسەرنجانەی خرانەڕوو، تا ئەو پەیڕەوە ئامانجەكانی خۆی بەدیبهێنێ لە پاڵپشتی وەزارەت لە گەشەپێدانی پڕۆژەكانی ڕێگاوبان و دانانی پێوەر بۆ بەرجەستەكردنی دادپەروەریی لە دابەشكردنی پڕۆژەكانی ئاوەدانكردنەوە و ڕێگاوبان، لەسەر پارێزگا و ئیدارە سەربەخۆكان بە پێی شایستەبوون، ئەویش لەبەر ڕۆشنایی بەرنامەی كاری كابینەی نۆیەمی حكومەتی هەرێمی كوردستان كە گرنگیدان بە بواری ڕێگاوبان، لە بڕگە سەرەكییەكانیەتی.