راچڵەکین-
قائیمقامییەتی قەزای کۆیە ڕایگەیاند، لە هەفتەی داهاتووەوە دەست بە دابەشکردنی نەوت دەکرێت و سەرجەم هاووڵاتیانی سنوری قەزاکە بەرمیلێک نەوتیان پێدەدرێت.
لە ڕاگەیەنراوێکدا قائیمقامیەتی قەزای کۆیە ئاگاداری هاووڵاتییانی سنوورەکە دەکاتەوە و دەڵێت:" هاووڵاتییانی سنوری قەزای كۆیە ( ناوشار،ناحیەكان،گوندەكان) لە هەفتەی داهاتووەوە هەر خێزانە و بەرمیلێك نەوتی بەسەردا دابەشدەكرێت".
لە راگەیەندراوەکەدا هاتووە، پرۆسەی دابەشكردنی نەوتی سپی بۆ ئەمساڵ لە ڕێگای ریزبەندی بریكارەكانی خۆراك دەبێت و هەر خێزانێك بڕی یەك بەرمیل نەوتی بۆ دابیندەكرێت لەبەرامبەر ئەو بڕەپارەیەیی حكومەتی هەرێم دیاریكردووە کە ٥٥ ھەزار دینارە.
دەشڵێت، پرۆسەكە لە هەفتەی داهاتووەوە دەستپێدەكات و بەردەوام دەبێت تا سەرجەم خێزانەكان بەشە نەوتی خۆیان بەسەردا دابەشدەكرێت و دواتر شێواز و شوێنی دابەشكردنی رووندەكەینەوە.