راچڵەكین-

عەبدولەتیف ئەحمەد، یەكێك لە رێبەرانی رەوتی سەلەفیەت لە هەرێمی كوردستان دەڵێت،
زۆر عەیب و كارەساتە پەرلەمان پڕۆژە نەمێنێت كاری لەسەر بكات، هەمواری پرۆژەیاسای بەرەنگاربونەوەی توندوتیژیی خێزان و ئافرەت نەبێت.

عەبدولەتیف ئەحمەد، كەلەهەمان كاتدا پێشنوێژ و وتارخوێنی مزگەوتی بەهەشت-ە لەسلێمانی لەپەیامێكدا دەڵێت:"زۆر عەیب و كارەساتە پەرلەمان پڕۆژە نەمێنێت كاری لەسەر بكات ئەوە نەبێت، لە شتە خراپەكان شوێن وڵاتانی غەرب بكەوین نەك لە باشەكان".

دەشڵێت: "باشە كە ناشتوانن وەكو ئەوان كێشەی خزمەتگوزاریە سەرەتاییەكانی وەك ڕێگاوبان و كارەباو سوتەمەنی زستان چارەسەر بكەن  ناتوانن كێشەی میللەت چارەسەر بكەن، دێن باری خێزانی و پەروەردەی كۆمەڵایەتی جوان و ڕەسەنی كوردی موسڵمان تێكدەدەن و وەك خێزانە سەرگەردان و لێكهەڵوەشاوەكانی ئەوانی لێدەكەن بۆئەوەی غەرب لێتان ڕازیبێت و ئێوەش بە ئازادیخوازو پێشكەوتو حیساب بكرێن".

هەر لەپەیامەكەیدا بۆ پەرلەمانی كوردستان ئاماژەی بەوەشكردوە، "دڵنیابن زەرەرێكی گەورە دەكەن و بەر نەفرەتی پەروەردگار و میللەتەكەشتان دەكەون".

21ی ئەم مانگە پەرلەمانی كوردستان خوێندنەوەی دوەمی بۆ پێشنیازەیاسای بەرەنگاربونەوەی توندوتیژیی خێزان و ئافرەت لە هەرێمی كوردستان كرد، ئەو پێشنیازە یاسایەش زۆرترین كاردانەوەی بەدوای خۆیدا هێنا، بەگوێرەی یەكێك لەبڕگەكانی پێشنیازە یاساكەش، زۆرلێكردنی پیاو بۆ سەرجێییكردن لەگەڵ هاوسەرەكەی، بەتوندوتیژی دادەنرێت.