راچڵەكین-
بەڕێوەبەرایەتی ئاسایشی راپەڕین دەستگیركردنی چوار تۆمەتباری راگەیاند كەهاوڵاتییەكیان رفاندووەو ئەشكەنجەیان داوە.
بەڕێوەبەرایەتی ئاسایشی راپەڕین بڵاویكردووەتەوە:" هەواڵ گەیشتە هێزەكانمان، كە لە رۆژی ١٤ی كانوونی دووەم، چوار كەس پلانیان داناوە بۆ رفاندنی هاوڵاتییەكی سنوورەكەمان و دوای ئەوەی فێڵیان لێكردووە، تاوانلێكراویان هێناوە بۆ ناحیەی گاپیڵۆن و لەوێ رفاندوویانە و ئەشكەنجەیەكی زۆری جەستەییان داوە و داوای بڕی ٩٥ هەزار دۆلاریان لێكردووە".
ئەوەش ڕوونكراوەتەوە:" دوای وەرگرتنی زانیاری ورد لەلایەن هێزەكانمانەوە توانرا شوێنی تۆمەتباران بدۆزرێتەوە و تۆمەتباران دەستگیربكرێن و تاوانلێكراو رزگار بكرێت".
ئاسایشی راپەڕین دەڵێت:" لە ئێستادا تۆمەتباران بە بڕیاری دادوەری دادگای لێكۆڵینەوەی رانییە و بەپێی ماددەی ٤٢١ لە یاسای سزادانی عێراقی پەڕاوی لێكۆڵینەوەیان بۆ كراوەتەوە و لێكۆڵینەوەكان بەردەوامە".