راچڵەکین –
دەستەی دەستپاکیی عیراق، دەستگیرکردنی سەرۆکی پێشووی دیوانی
وەقفی سوننەی راگەیاند کە بە تێوەگلان لە گەندەڵی و بەهەدەردانی ماڵی گشتی
تۆمەتبار کراوە.
ئەمڕۆ
سێشەممە، فەرمانگەی لێکۆڵینەوە لە دەستەی دەستپاکی عیراق رایگەیاند: فەرمانی
دەستگیرکردنی سەرۆکی پێشووی وەقفی سوننە جێبەجێکرا کە لە لایەن دادگای لێکۆڵینەوەی
کەرخ دەرکراوە.
روونیشیکردەوە،
سەرۆکی پێشووی دیوانی وەقفی سوننە تۆمەتبارە بە کۆمەڵێك سەرپێچی دارایی و لە
نێویشیاندا کڕینی هۆتێلێک بە 47 ملیار دینار و پاشان بە کرێ دراوەتەوە بە خاوەنەکە.
بەشێکی
دیکە لەو تۆمەتانەی ئاراستەی دەستگیرکراوەکە کراون پێکدێن لە: زیادەڕەویکردن لە
نرخی جێبەجێکردنی پرۆژەکانی دروستکردنی منارە لە پارێزگای سەڵاحەدین کە بە هۆیەوە
1.5 ملیار دینار بەهەدەر دراوە، سەرپێچیکردنی دارایی و کارگێڕی لە گرێبەستێکی
نێوان دیوانی وەقفی سوننە و کۆمپانیایەکی ژاپۆنیدا کە بەهاکەی لە 42 ملیار و 27
ملیۆن دینار زیاترە، بەهەدەردانی 100 ملیار دینار لە کڕینی دوو عەقاردا کە
رووبەرەکەی 460 دۆنم بووە.