راچڵەكین-
بەڕێوەبەرایەتیی گشتیی ئاو ڕایدەگەیەنێت، هاوڵاتیان بۆ ئاسانكاری و سوككردنی ئەركی سەرشانیان، دەتوانن بە چەند شێوازێك قەرز و كرێی ئاو بدەنەوە و وردەكارییەكەشی ئاشكرا دەكات.
ئاری ئەحمەد، بەڕێوەبەری گشتیی ئاوی هەرێمی كوردستان، بەمیدیای نزیك لەپارتی راگەیاندووە:" لەمەودوا ئەو پسوولەی ئاو كە دەچێتە بەردەمی ماڵان سێ پارچەیە و هاووڵاتی سەرپشكە لەوەی كە كرێی ئاوی دوو مانگ دەدات كە بۆی دەداتەوە، یان كرێی ئەو دوو مانگە و قەرزی پێشوویشی دەداتەوە، لە بەردەرگای خۆی هاووڵاتی دەتوانێت هەم كرێی ئاو، هەم قەرزیش بداتەوە، یان بەتەنیا كرێی ئاوەكە بدات.''
وتیشی: "ئەو بڕیارە بۆ كارئاسانیی زیاتر و سووككردنی ئەركی سەرشانی هاووڵاتییە، هەر قەرزێكیش لە بەردەرگا بیدەنەوە لەسەر كۆی گشتیی قەرزەكەی كەم دەكرێتەوە.''
بەڕێوەبەری گشتیی ئاوی هەرێمی كوردستان جەختی كردەوە: "لەو كاتەی كارمەندانی تایبەت بە سستەمكردن و كۆكردنەوەی كرێی ئاو لەلایەن كۆمپانیا دیاریكراوەكان دێنە بەردەم ماڵەكانیان، یاخود شوێنی كاریان كە تۆڕی ئاوی خواردنەوەی پێ گەیشتووە، هاووڵاتییان لەو بڕیارە سوودمەند دەبن.''
ڕەزامەندی دراوە لەسەر درێژكردنەوەی لێخۆشبوونی 15%ی قەرزی كرێی ئاوی هاووڵاتییان و تاوەكوو10ی 6 بەردەوام دەبێت.
سەبارەت بەوەی هاووڵاتییان لە كاتی وەرگرتنی پسوولەی كرێی كارەبا لەو لێخۆشبوونە سوودمەند دەبن، بەڕێوەبەری گشتیی ئاو وتی: "داشكانەكە پەیوەندی بەو بابەتە نییە، چونكە ئەو داشكانی 15%ـە لەنێو فەرمانگە دەكرێت، بەڵام ئەوەی بیەوێت داشكانەكەی بۆ بكرێت، ئەویش دەكرێت، بەڵام وا باشترە ئەوانەی قەرزی ئاو پاكتاو دەكەن، سەردانی فەرمانگەی ئاو بكەن.''