راچڵەكین-
مەكتەبی سیاسی یەكێتی نیشتمانی كوردستان رایدەگەیەنێت" چاومان لەسەركەوتنێكی گەورەی یەكێتیی نیشتمانیی كوردستان و ئەزموونی گەلەكەمانە تاكو رێڕەوی حوكمڕانی ڕاست بكەینەوە"
مەكتەبی سیاسیی یەكێتیی نیشتمانیی كوردستان پەیامێكی بەبۆنەی هاتنی نەورۆز و جەژنی بەهار و تاجی راپەرین بڵاوكردەوە و رایگەیاند:"نەورۆزی ئەمساڵمان، مژدەی قۆناغێكی تری خەباتی مەدەنی هێناوە كە هەڵبژاردنی پەرلەمانی كوردستانە، بۆ ئەم ئەركەی خەبات بەگیانی ئازادیخوازانەی نەورۆزی دێرین وجۆش و خرۆشی راپەڕیەنەوە چاومان لەسەركەوتنێكی گەورەی یەكێتیی نیشتمانیی كوردستان و ئەزموونی گەلەكەمانە تاكو رێڕەوی حوكمڕانی ڕاست بكەینەوە".
دەقی پەیامەكە:
بە بۆنەی جەژنی نەتەوەیی نەورۆز و ساڵی نوێی كوردی (٢٧٢٤) ، یادی تاجی راپەڕینی رزگاری كەركوكی قودسی كوردستانەوە پیرۆزبایی گەرم لە كۆمەڵانی خەڵكی كوردستان دەكەین ،ئومێدەوارین نەورۆزی ئەمساڵ مژدەی گۆرانكاریی دیموكراسیی و هەڵبژاردن لەپێناو خزمەتكردنی باشتری گەلەكەمان و ژیان و گوزەرانیان بەدوای خۆیدا بهێنێت .
نەورۆز لە دیرۆكی گەلانی نەورۆزخوازدا جەژنی بەهار و نوێبوونەوەی سروشت و ژیانە ، لە ژیانی نەتەوەی كوردیشدا بەتایبەتی جەژنی ئازادی و سەرفرازی هێمای خەباتە بۆ بەگژداچونەوەی زوڵم و ستەمكاری، لە وێستگەی راپەڕینی ساڵی ١٩٩١یشەوە جەژنێكی سەرباری ئازادی نیشتمانییە كە رۆژی رزگاری كەركوكی قودسی كوردستان و تاجی سەركەوتنی راپەرینە .
نەورۆزی ئەمساڵمان، مژدەی قۆناغێكی تری خەباتی مەدەنی هێناوە كە هەڵبژاردنی پەرلەمانی كوردستانە، بۆ ئەم ئەركەی خەبات بەگیانی ئازادیخوازانەی نەورۆزی دێرین وجۆش و خرۆشی راپەڕیەنەوە چاومان لەسەركەوتنێكی گەورەی یەكێتیی نیشتمانیی كوردستان و ئەزموونی گەلەكەمانە تاكو رێڕەوی حوكمڕانی ڕاست بكەینەوە، گوزەران و ژیانێكی شایان و سەرفرازتر، بێ جیاوازی و جیاكاری لەسەرتاسەری هەرێمی كوردستاندا فەراهەم بكەین .
جارێكی تر جەژنی نەتەوەیی نەورۆز و ساڵڕۆژی سەركەوتنی راپەرین بەرز و پیرۆز بێت .
مەكتەبی سیاسیی
یەكێتیی نیشتمانیی كوردستان