راچڵەكین -
ئاژانسی نێودەوڵەتی وزەی ئەتۆم رەتیدەكاتەوە هیچ زیانێك لەئەنجامی هێرشەكەی بەرەبەیانی ئەمڕۆ بۆسەر ئێران، بە پێگە ئەتۆمییەكانی ئەو وڵاتە گەیشتبێت و داواش لەهەموو لایەنێك دەكات دان بەخۆیاندا بگرن و كاردانەوەی زیاتر نەنوێنن.
لەراگەیەندراوێكدا كە ئەمڕۆ هەینی بڵاویكردەوە، ئاژانسی نێودەوڵەتی وزەی ئەتۆم ئاشكرایكرد، شوێنە ئەتۆمییەكانی ئێران پارێزراون و هیچ زیانێكیان پێنەگەیشتووە.
بەرەبەیانی ئەمڕۆ هەینی، بە درۆن هێرشكرایە چەند پێگەیەكی سەربازیی لە شاری ئەسفەهانی ناوەڕاستی ئێران و دەنگی چەند تەقینەوەیەكیش بیستران.
تەلەفزیۆنی فەرمی ئێران پشتڕاستی كردەوە كە هیچ دامەزراوەیەكی ئەتۆمی لە شاری ئەسفەهان نەكراوەتە ئامانج و هێرشەكە كاریگەری لەسەر نەبووە.
لەدوای هێرشەكە، رافایل گرۆسی، بەڕێوەبەری گشتی ئاژانسی نێودەوڵەتی وزەی ئەتۆم رایگەیاند: نابێت بە هیچ شێوەیەك دامەزراوە ئەتۆمییەكان ببنە ئامانج لە ململانێ سەربازییەكاندا.
وتیشی:" بە وردی چاودێری دۆخەكە دەكەین و داواش لە هەموو لایەنەكان دەكەین ئەوپەڕی دانبەخۆیاندا بگرن و كاردانەوەی زیاتر نەنوێنن".
هاوكات، ئاژانسی هەواڵی مێهر-ی ئێران بڵاویكردەوە، سیستەمی بەرگری ئاسمانی، سێ فڕۆكەی بێفڕۆكەوانی بچووكی لە ئاسمانی پارێزگای ئەسفەهان تێكشكاندووە، دەنگی ئەو تەقینەوەیەش بەهۆی تێكشكاندنی درۆنەكانەوە بووەو هیچ شوێنێك نەكراوەتە ئامانج.