راچڵەکین-
بەڕێوەبەرایەتی هاتوچۆی سلێمانی ڕوونکردنەوەیەکی لەبارەی گیانلەدەستدانی کارمەندێکی بەڕێوەبەرایەتییەکەیان بڵاودەکاتەوە و رایدەگەیەنێت: بەهۆی کێشەیەکی تایبەت کۆتایی بەژیانی خۆی هێناوە نەوەک کوژرابێت.
دەقی روونکردنەوەکەی بەڕێوەبەرایەتی هاتوچۆی سلێمانی:
بۆ ڕای گشتی
بە گرنگی دەزانین روونکردنەوەیەک بدەین لەسەر ڕووداوی خۆکوژی کارمەندی هاتووچۆی بەڕێوەبەرایەتیمان لە هۆبەی کۆنترۆڵی هاتووچۆی سلێمانی، ڕێپێدراوی هاتووچۆ (هەڵگورد محمود مستەفا) کە لە هەندێک پەیج و ماڵپەڕ نابەرپرسانە هەواڵەکەیان چەواشە کردووە و بە شێوەیەکی ناڕاست زانیارییەکانیان بڵاو کردۆتەوە کە گوایە لەسەر شەقام کوژراوە.
کارمەندی ناوبراومان سروشتی کارەکەی لەسەر شەقام نەبووە و ئەرکەکەی لە هۆبەی کۆنترۆڵ بووە و لە درەنگانی شەو لە ناو ماڵەکەیدا بەهۆی کێشەیەکی تایبەت بەخۆی (بەدەستی خۆی) کۆتایی بە ژیانی هێناوە، وە لە ئێستادا لێکۆڵینەوە بەردەوامە لەسەر هۆکار و ووردەکاری ئەو ڕووداوە، ئەو دەنگۆیانە دوورن لە ڕاستییەوە کە تاوانێکی کوشتن بووبێت، بەڵکو ڕووداوەکە (خۆکوژی) بووە.