راچڵەکین-
بڵاوکراوەی ئەمریکی پۆلیتیکۆ لە ڕاپۆرتێکدا نووسیویەتی: "محەمەد بن سەلمان، لەم دواییانەدا لە گفتوگۆیەکدا لەگەڵ یاسادانەرانی ئەمریکی هەوڵی کوشتنی بۆ سەر ژیانی خۆی ڕاگەیاند".
ئەمریکا لە هەوڵدایە ئیسرائیل و سعودییە بگەنە رێککەوتنێکی ئاشتی و پەیوەندییەکانیان ئاسایی بێتەوە. سعودییەش چەندین جار وتوویەتی مەرجمان بۆ ئەم رێککەوتنە دروستکردنی دەوڵەتێکە بۆ فەڵەستین.
ڕۆژنامەکە نووسیویەتی: محەممەد بن سەلمان بە ئەندامانی کۆنگرێسی ئەمەریکای ڕاگەیاندووە، بەهۆی هەنگاونان بۆ ڕێککەوتنێکی گەورە لەگەڵ ئەمریکا و ئیسرائیل بەمەبەستی ئاساییکردنەوەی پەیوەندییەکانی نێوان ڕیاز و تەلئەبیب، ژیانی خۆی دەخاتە مەترسییەوە.
ئاماژە بەوە کراوە، محەممەد بن سەلمان باسی ئەنوەر ساداتی سەرکردەی میسری کرد کە دوای ڕێککەوتنی ئاشتی لەگەڵ ئیسرائیل کوژرا، و لە دەسەڵاتی یاسادانانی ئەمریکای پرسی کە ئەمریکا چی کردووە بۆ پاراستنی سادات.
هەروەها باسی لەو هەڕەشانە کردووە کە ڕووبەڕووی دەبێتەوە، ڕوونی کردووەتەوە کە دەبێت ڕێککەوتنێکی لەو شێوەیە ڕێگایەکی ڕاستەقینە بۆ دەوڵەتێکی فەلەستینی لەخۆبگرێت، بەتایبەتی ئێستا کە شەڕی غەززە توڕەیی عەرەبەکانی بەرامبەر ئیسرائیل توندتر کردووە.
ئەم بڵاوکراوە ئەمریکییە لەم بارەیەوە نووسیویەتی: دانوستانەکانی نێوان شازادەی جێنشینی سعودیە و یاسادانەرانی ئەمریکا قورس و جددی بووە، بەڵام سەرچاوەکان باس لەوە دەکەن کە شتێکی گرنگ ئەوەیە کە شازادەی جێنشینی سعودیە، سەرەڕای مەترسییەکانی ئێستا بە نیازە مامەڵەیەکی گەورە لەگەڵ ئەمریکا و ئیسرائیل بکات. چونکە رێککەوتنەکە بە گرنگ دەزانێت بۆ داهاتووی وڵاتەکەی".
پۆلیتیکۆ نووسیویەتی: مەرجەکانی پەیماننامەکە تا ڕادەیەکی زۆر نهێنین و هێشتا پەرەیان پێدەدرێت. ڕێککەوتنەکە چەندین پابەندبوونی ئەمریکا بە سعودییەکان لەخۆدەگرێت، لەوانە گەرەنتی ئەمنی لە ڕێگەی پەیماننامەیەکەوە، هاوکاریکردن بۆ بەرنامەی ئەتۆمی مەدەنی و وەبەرهێنانی ئابووری لە بوارەکانی وەک تەکنەلۆجیادا.
هەروەها پۆلەتیکۆ لە زاری بەرپرسێکی باڵای سعودیەوە ڕایگەیاندووە:" محەمەد بن سەلمان پێی وایە بەبێ چارەسەرکردنی پرسی فەڵەستین، وڵاتەکەی لە کۆتاییدا سوودمەند نابێت لەو قازانجە ئابوری و تەکنیکی و سەربازییەی کە لە ڕێککەوتنە گشتییەکەدا هاتووە. ئەمەش لەبەر ئەوەیە کە سعودیە بەبێ چارەسەرکردنی پرسی فەڵەستین ئاسایش و سەقامگیری لە ناوچەکە نابێت".