راچڵەكین -

دادگای تاوانەكانی سەڵاحەدین سزای 10 ساڵ زیندانیكردن بەسەر بەرپرسێكی فەرمانگەی تەندروستی لەو پارێزگایەدا دەسەپێنێت بەتاوانی دزینی جۆرە دەرمانێكی گرانبەها.

دەستەی دەستپاكیی عیراق بڵاویكردەوە، دوای ئەوەی دادگای تاواەكانی سەڵاحەدین كەسێكی گەندەڵیی یەكلاییكردەوە، بڕیاریدا بە سەپاندنی سزای 10 ساڵ زیندانیكردن بەسەر بەرپرسی پێشووی بەشی دەرمانخانە لە بەڕێوەبەرایەتی تەندروستی پارێزگای سەڵاحەدین.

لە راگەیەندراوەكەدا ئاماژە بەوەكراوە، تاوانبار محەمەد سەڵاح عەبد سحاب، كە پێشتر بەرپرسی بەشی دەرمانخانە بووە لە بەڕێوەبەرایەتی تەندروستی پارێزگای سەڵاحەدین، دوای ئەوەی تاوانی دزیكردنی هەزاران پارچە دەرمانی جۆری (كلكسان)ی بەسەردا ساغبووەوە، لە پستەكەی لابراو فەرمانی دەستگیركردنی بۆ دەرچوو، بەڵام ناوبراو خۆی رادەست نەكردو هەڵات، دوای بردنی كەیسەكە بۆ بەردەم دادگای تاوانەكالنی سەڵاحەدین، بەشێوەیەكی غیابی سزای 10 ساڵ زیندانیكردنی بەسەردا سەپێندرا.

لەسەر هەمان كەیس، فەرمانبەرێكی تەندروستی سەڵاحەدین بەتاوانی بەشداریكردن لە دزییەكەو هاوكاریكدرنی تاوانباری سەرەكی، سزای سێ ساڵ زیندانیكردنی بەسەردا سەپێندرا.