راچڵەکین-

 

وتەبێژی لیستی 129ی یەکێتی نیشتمانی کوردستان روونکردنەوەیەکی لەبارەی رووداوەکەی ئەمڕۆی مزگەوتی رەشاد موفتیی هەولێرەوە بڵاوکردەوە.

کاروان گەزنەیی وتەبێژی لیستی 129ی یەکێتی نیشتمانی کوردستان رایگەیاند: بەداخەوە جارێکی تر لە ڕێگەی نانەوەی ئاژاوە، بەهۆی ترس لەهەڵبژاردن و شکستی هەڵبژاردن، لە ماوەی چەند ڕۆژێکدا، دووەم جارە لە ڕێگەی کاری ئاژاوەگێڕییەوە، هەوڵ بۆ تێکدانی هەڵبژاردن دەدرێت.

ئاماژەی بەوەشکرد: دیارە، دوای نیوەڕۆی ئەمڕۆ دووشەممە، لەکاتی بەشداری کردنی شاڵاو کۆسرەت رەسوڵ لە پرسەی کۆچکردوو (تۆفیق حاجی حەمەکە) کە خانەوادەیەکی یەکێتین، کوڕێکی ( قەهاری سابیر عەلکە) لەناو مزگەوت قسەی نەشیاو دەکات، لە بەرامبەردا، لەپای ڕێزگرتن لە حەرەمی مزگەوت و نەریتی کۆمەڵایەتی و ئایینی میللەتەکەمان و خانەوادەی کۆچکردوو ، شاڵاو کۆسرەت رەسوڵ وەڵامی ناداتەوە، هەرچەندە لە ماوەی هەفتەیەکدا ئەوە دووەم جارە ئەم ئاکارە ناشیرینە لە بازاڕی هەولێر و لە حەرەمی مزگەوتیش دووبارە بووەتەوە.

باسی لەوەشکرد: دواتر پاسەوانەکانی قەهار، لەکاتی جێهێشتنی مزگەوت لەلایەن شاڵاو کۆسرەت ڕەسوڵ، لە ناو مزگەوتەکەدا تەقە دەکەن، تەواوی ئەو کار و کردەوانە بە هەوڵی نەزۆک دەبینین بۆ تێکدانی ئارامی و بەڕێوەچوونی هەڵبژاردن لە کاتی خۆیدا، ئەم کردارانەش بەڕوونی ترسن لە هەڵبژاردن و پێچەوانەی دروشمەکانی خۆیانن، ئەمەش دەرخەری ئەو ڕاستیەیە کە دۆڕان و شکست چاوەڕوانییان دەکات.

کاروان گەزنەیی جەختی لەوەشکردەوە: جارێکی تر، وەکو یەکێتی نیشتیمانی کوردستان، جەخت لە بانگەشەیەکی هێمن و مەدەنی و دیموکراسی دەکەینەوە و داواکارین لە هەموو لایەنەکان بانگەشەیەکی هێمن و ئارام بەڕێوەببەن.