راچڵەكین -
حكومەتی ئیمارات دەستگیركردنی سێ كەسی راگەیاند كە تۆمەتبارن بە كوشتنی هاووڵاتییەكی ئیسرائیلی، كە نیشتەجێی ئیماراتەو ماوەی چوار رۆژ چارەنووسی نادیار بوو.
بەگوێرەی راگەیەندراوێكی وەزارەتی ناوخۆی ئیمارات، هێزەكانی ئەو وڵاتە دوای دۆزینەوەی تەرمی هاووڵاتییەكی ئیسرائیلی بەناوی زڤی كۆگان، كە هەڵگری رەگەزنامەی مۆڵدۆڤایەو ماوەیەكە لە ئیمارات نیشتەجێیە، توانییان لەمایەكی كەمدا سێ كەس دەستگیربكەن، كە گومان دەكرێت بكوژی حاخامەكە بن.
وەزارەتی ناوخۆی ئیمارات بەبێ ئاشكراكردنی ناسنامەی تۆمەتبارە دەستگیركراوەكان، ئاماژەی بەوەشكردووە، لێكۆڵینەوە لە هۆكارو چۆنیەتی كوشتنی حاخامەكە بەردەوامەو دوای گەیشتن بە راستیی رووداوەكە، تەواوی زانیارییەكان بۆ رای گشتی ئاشكرا دەكەن.