مامۆستایانی ناڕازی هۆشداری دەدەنە حکومەتی هەرێم

کوردستان

پێش 2 هەفتە     ژمارەی بینراو 270

راچڵەکین-

ئەنجومەنی سەرتاسەریی مامۆستایان و فەرمانبەرانی ناڕازیی هۆشداری لەبارەی مووچەی مانگی 12 دەدات و رایگەیاند، ئەگەر ئەمڕۆ و سبەینێ‌ خشتەی مووچەی مانگی 12 رانەگەینرێت و پابەندی پلەبەرزكردنەوە نەبن خۆپیشاندان دەبەنە هەولێر.

ئەمڕۆ سێشەممە، ئەنجومەنی سەرتاسەریی مامۆستایان و فەرمانبەرانی ناڕازیی لە راگەیەنراوێكدا ئاماژەیان بەوە کرد، لەلایەن حکومەتی هەرێمەوە ئەمڕۆ و سبەینێ لیستی مووچەی مانگی 12 بڵاونەکاتەوە و تا رۆژی شەممە 8ـی ئەم مانگە  پابەندبوونی خۆی بە پلەبەرزکردنەوە و داوا رەواکانی تری مانگرتووانەوە رانەگەیەنێت کە خۆیان هۆکارن نەک بەغداد، ئەوا ئەوان رۆژی 9ـی ئەم مانگە هەولێر ناوەندی بڕیارەکان دەکەن بە پایتەختی دەربڕینی ناڕەزایەتییەکانیانو خۆپیشاندانەکان دەگوازنەوە بۆ هەولێر. 

دەقی راگەیەنراوەكە:

هۆشداریی بۆ دەسەڵاتی هەولێر

سەرباری 10 ساڵ لە خەباتی مەدەنیی مامۆستایان؛ لەوانە:

(بایکۆت، بەیاننامە و ڕاگەیەنراو، هەڵمەتی هاشتاگ، خۆپیشاندان، خێمە هەڵدان، شەهیدبوونی چەندین خۆپیشاندەر، سەردانیکردنی لایەنە پەیوەندیدارەکانی بەغداد، سکاڵا تۆمارکردن، سەردانی UN و باڵیۆز و کونسوڵخانەکان، ناردنی پەیام و ڕاپۆرت بۆ بەرپرسان و پەرلەمان و ڕێکخراوە جیهانییەکان، …تاد) دوواهەمینیان (مانگرتنی کۆمەڵێک هاوڕێمانه لە خواردن و خواردنەوە لەبەردەم نووسینگەی UN لە سلێمانی)؛

دەسەڵات لەم 10 ساڵەدا نەک نەهاتوونەتە ژێرباری جێبەجێکردنی هیچکام له داوا رەوا و سەرەتاییەکانمان کە لە ئێستادا هاوڕێیانمان ماوەی 8 رۆژە مانیان لە خواردن و خواردنەوە گرتووە، لەپێناو جێبەجێکردنیاندا؛ وەک:

پلەبەرزکردنەوە

بەنیشتمانیکردنی مووچەکانمان (توگین).

دیاریکردنی چارەنووسی مووچەپاشەکەوتکراوەکان.

پێدانی مووچەی 30 ڕۆژ جارێک.

گێڕانەوەی شکۆ بۆ تاکی کورد و مووچەخۆران.

سەرباری ئەوەش؛ لەم ماوە زۆرەی خەباتە مەدەنییەکانمان؛ بەردەوام لە هەوڵی ناشیرینکردنی کەسایەتی ڕێکخەرانی ناڕەزایەتییەکان و نەنگیدانانە پاڵ خەباتەکەماندا بوون و دەیان تۆمەتی ناڕەوایان داوەتە پاڵمان.

لەگەڵ ئەوەشدا دەیانەوێت پێدانی مووچەی مانگی 12 دیزەبەدەرخۆنە بکەن و خۆیانی لێ بدزنەوە.

هەر بۆیە لێرەوە رایدەگەیەنین؛ دەسەڵات ئەمڕۆ و سبەینێ لیستی مووچەی مانگی 12 بڵاونەکاتەوە و بەزوویی و تا رۆژی شەممە 8-2  پابەندبوونی خۆی بە پلەبەرزکردنەوە و داوا ڕەواکانی تری مانگرتووانەوە رانەگەیەنێت کە خۆیان هۆکارن نەک بەغداد ئەوا ڕۆژی یەکشەممە 9-2 لە هەولێر ، ناوەندی بڕیارەکان دەکەین بە پایتەختی دەربڕینی ناڕەزایەتییەکان و لە سەرجەم شار و شارۆچکەکانەوە بە لێشاو ڕووی تێدەکەین. هاوکات بایکۆتی هۆڵەکانی خوێندن بەردەوام دەبێت.

بۆ ئەم مەبەستە داوا لە مامۆستایان و فەرمانبەران و مرۆڤە ویژدانساغەکانی هەولێری هۆلاکۆبەزێن و دهۆکی مەردایەتی و حیزبە سیاسیی و رێکخراوە پیشەیی و مەدەنیەکانی دەرەوەی دەسەڵات دەکەین، هاوکار و پشتیوانمان بن.

ئەنجومەنی سەرتاسەریی مامۆستایان و فەرمانبەرانی ناڕازیی

٤ی ٢ی ٢٠٢٥

داگرتنی ئەپی راچڵەکین بۆ ئەندرۆید

داگرتنی ئەپی راچڵەکین بۆ ئایفۆن