راچڵەكین-
هێزەكانی بەڕێوەبەرایەتی گشتیی دژەتیرۆر و هاوپەیمانان توانییان ژمارەیەك چەكداری داعش دەستگیر بكەن كە پەیوەندییان لەگەڵ بەرپرسانی پێشووی بەناو ویلایەتی بەغدادی دەوڵەتی ئیسلامی هەبووە.
ئەمڕۆ چوارشەممە، هێزەكانی بەڕێوەبەرایەتی گشتیی دژەتیرۆر لەراگەیەندراوێكدا بڵاویكردووەتەوە:" تیرۆرستە دەستگیركراوەكان پەیوەندی ڕاستەوخۆیان لەگەڵ ژمارەیەك لە بەرپرسە سەربازییەكانی داعش هەبووە و پلانیان داڕشتووە بۆ یٔەنجامدانی كردەوەی تیرۆریستی لە سنووری پارێزگای كەركوك پاش رووخانی ڕژێمی سوریا".
" تۆمەتبارەكان پێشتر ئەندامی چالاكی ڕێكخراوی داعش بوون و پەیوەندی بەهێزیان لەگەڵ سەركردە دیارەكانی داعش هەبووە و بەشداربوون لە پلاندانان بۆ هێرشی چەكداری لە ناوچەكە"
هەر لەراگەیەنراوەكەدا ئاماژە بەوەشكراوە:"توانرا بە شێوەیەكی پڕۆفیشناڵ و بێ هیچ زیانێك ئۆپەراسیۆنەكە ئەنجام بدرێت و تۆمەتبارەكان دەستگیر بكرێن، پاشان تۆمەتبارەكان ڕادەستی دادگای تایبەتمەند كران بۆ لێكۆڵینەوەی زیاتر و وەرگرتنی سزای یاسایی".