راچڵەكین-

دەرباز كۆسرەت رەسول، ئەندامی مەكتەبی سیاسی یەكێتی نیشتمانی كوردستان، رایدەگەیەنێت:" بەشكۆوە رێز لە قوربانیدانی گەلەكەمان دەگرین بۆ ئازادی و رووبەڕووبوونەوەی زوڵم و ستەمكاریی."

ئەمڕۆ چوارشەممە 5-3-2025 دەرباز كۆسرەت رەسول، ئەندامی مەكتەبی سیاسی یەكێتی نیشتمانی كوردستان پەیامێكی لە 34 ساڵەی راپەڕینی گەلی كوردستان بڵاوكردووەتەوە:"پێویستە بە گیانی بەرپرسیارانەوە بەڵێن دووپات بكەینەوە بۆ خزمەتكردن و پاراستنی ئەم دەستكەوتانەی كە بە خوێنی رۆڵەكانمان لە راپەڕینی بەهاری ١٩٩١ دا بەدیهاتن."

دەقی پەیامەكەی دەرباز كۆسرەت رەسول

لە سی و چوارەمین ساڵیادی راپەڕینە مەزنەكەی بەهاری ١٩٩١ ی گەلی كورد، بەشكۆوە رێز لە قوربانیدانی گەلەكەمان دەگرین بۆ ئازادی و رووبەڕووبوونەوەی زوڵم و ستەمكاریی. 
راپەرین وەرچەرخانێكی مێژوویی بوو، سەرەتای قۆناغێكی نوێی گەلەكەمان بوو دژ بە ستەم و نادادی، پێكهێنانی بەرەی كوردستانی بۆ راماڵینی زوڵمی بەعس لەو قۆناغەدا، بەڵگەیەكی بەهێز بوو لەسەر یەكڕیزیی پێكهاتەكانی گەلی كوردو ویستی ئازادیخوازیی.
لەو یادە پڕشكۆیەدا سەری رێز بۆ شەهیدانی راپەڕین و سەرجەم شەهیدانی گەلەكەمان دادەنەوێنم، پێویستە بە گیانی بەرپرسیارانەوە بەڵێن دووپات بكەینەوە بۆ خزمەتكردن و پاراستنی ئەم دەستكەوتانەی كە بە خوێنی رۆڵەكانمان لە راپەڕینی بەهاری 1991 دا بەدیهاتن. 
دەرباز كۆسرەت رەسوڵ 
ئەندامی مەكتەبی سیاسی 
یەكێتیی نیشتمانیی كوردستان