راچڵەكین- 

وەزیری دەرەوەی ئەمریكا، لە پەیوەندییەكەی تەلەفونیدا لەگەڵ سەرۆكوەزیرانی عێراق، پرسی مووچەی فەرمانبەرانی هەرێم و هەناردەی نەوت،  هێرشە درۆنییەكان و پڕۆژەیاسای دەستەی حەشدی شەعبی كردووە.

ئەمڕۆ چوارشەممە 23ی تەمووزی 2025 تامی بروس، وتەبێژی وەزارەتی دەرەوەی ئەمریكا لە راگەیەندروێكدا بڵاویكردووەتەوە، ماركۆ روبیۆ، وەزیری دەرەوەی ئەو وڵاتە بەتەلەفۆن قسەی لەگەڵ محەمەد شیاع سودانی، سەرۆكوەزیرانی عیراق كردووە.

ئاماژەی بەوەشكردووە، لەو پەیوەندییە تەبەفۆنییەدا رۆبیۆ لەبارەی هێرشە درۆنییەكانی ئەم دواییانە بۆسەر كیڵگە نەوتییەكانی هەرێم بەتایبەت ئەوانەی لەلایەن كۆمپانیا ئەمریكییەكانەوە بەڕێوەدەبرێن، جەختیكردووە لە گرنگی لێپرسینەوە لە ئەنجامدەرانی هێرشەكان و رێگریكردن لە دووبارەبونەوەیان كردەوە.

وەزیری دەرەوەی ئەمریكا جەختیكردووە لە گرنگی بەردەوامی پێدانی مووچەی هەرێمی كوردستان و دەستپێكردنەوەی هەناردەكردنی نەوت لە رێگەی بۆریی عیراق-توركیا.

وتەبێژی وەزارەتی دەرەوەی ئەمریكا ئاماژەی بەوەكردووە، رۆبیۆ نیگەرانیی قوڵی وڵاتەكەی لەبارەی پڕۆژە یاسای دەستەی حەشدی شەعبی دووپاتكردەوە، كە لە ئێستادا لە ئەنجومەنی نوێنەرانی عیراقە:"هەر یاسایەكی لەو شێوەیە دەبێتە هۆی بەدامەزراوەییكردنی هەژمونی ئێران و گروپە چەكدارە تیرۆریستییەكان، ئەمەش سەروەریی عێراق لاواز دەكات."