راچڵەكین -

هێزە ئەمنییەكانی عیراق لەسەر روداوی هەڵكوتانە سەر فەرمانگەیەكی كشتوكاڵ-ی بەغدا، ژمارەیەك چەكداری حەشدی شەعبی دەستگیر دەكەن.

فەرماندەیی ئۆپەراسیۆنە هاوبەشەكانی عیراق لە راگەیەندراوێكدا بڵاویكردەوە، دوای ئەوەی لەسەر فەرمانی محەمەد شیاع سودانی، فەرماندی گشتی هێزە چەكدارەكانی عیراق، لیژنەیەكی لێكۆڵینەوە لەسەر رووداوی هەڵكوتانە سەر فەرمانگەیەكی كشتوكاڵ لە بەری كەرخ-ی شاری بەغدا پێكهێنرا، هێز ئەمنییەكان توانییان 14 كەس بە تۆمەتی بەشداریكردن لە رووداوەكە، دەستگیر بكەن، كە سەرجەمیان سەر بە هێزەكانی هەردوو لیوای 45 و 46ی حەشدی شەعبین.

لە راگەیەندراوەكەدا ئاماژە بەوەكراوە، دوای گرتنبەری رێكاری یاسایی بەرامبەر چەكدارەكانی حەشدی شەعبی، سەرجەمیان رادەستی دادگا كران بەمەبەستی وەرگرتنی سزای یاسایی.

بەیانی ئەمڕۆ یەكشەممە 27-7-2025، هێزێكی حەشدی شەعبی بە هۆكارێكی نادیار، هەڵیانكوتایە سەر فەرمانگەی كشتوكاڵ لە بەری كەرخ-ی شاری بەغدا و ویستیان دەستی بەسەردا بگرن، بەڵام لەلایەن هێزێكی ئەمنییەوە بەرپەرچیان درایەوەو بەهۆیەوە شەڕە تەقە لەنێوانیان دروستبوو.