راچڵەكین -

حەشدی شەعبی هەڵوێستی خۆی لەبارەی رووداوەكەی شاری بەغدا ئاشكرا دەكات كە ژمارەیەك لە چەكدارەكانی هێرشیان كردە سەر فەرمانگەیەكی كشتوكاڵ و بەهۆیەوە 14 چەكداریان دەستگیركرا، رایدەگەیەنێت: رێگە بە هیچ كارمەندێكمان نادەین سەرپێچی لە رێكارە ئەمنییەكان بكات.

دەستەی حەشدی شەعبی لە راگەیەندراوێكدا كە ئەمڕۆ یەكشەممە 27-7-2025 بڵاویكردەوە، پابەندبوونی بە یاسا و دیسپلینی سەربازی راگەیاندووە و راشیگەیاندووە، رێگە بە هیچ چەكدارێكی حەشد نادەین سەرپێچی لە بڕیار و رێكارە ئەمنییەكان بكات، كە لەلایەن فەرماندەی گشتی هێزە چەكدارەكانی عیراقەوە دەرچووە.

حەشدی شەعبی جەختی لەوەكردووەتەوە كە بوونی ئەوان لەپێناو ئەوەیە ببنە قەڵغانێك بۆ هاووڵاتیان و درێژكراوەی دامەزراوە ئەمنییەكان بن، كە لەژێر سایەی دەوڵەت و سەركردایەتییە فەرمییەكەیدا كار بكەن، هەر هەڵسوكەوتێكی تاكەكەسی یان بەكۆمەڵ، كە لەو چوارچێوەیە لابدات، بە سەرپێچیكردنی یاسای دەزانین و لێی خۆشنابین.

بەیانی ئەمڕۆ یەكشەممە 27-7-2025، هێزێكی حەشدی شەعبی هەڵیانكوتایە سەر فەرمانگەی كشتوكاڵ لە بەری كەرخ-ی شاری بەغدا و ویستیان دەستی بەسەردا بگرن، بەڵام لەلایەن هێزێكی ئەمنییەوە بەرپەرچیان درایەوەو بەهۆیەوە شەڕە تەقە لەنێوانیان دروستبوو، لەدوای رووداوەكەش بە فەرمانی محەمەد شیاع سودانی، فەرماندەی گشتی هێزە چەكدارەكانی عیراق لیژنەی لێكۆڵینەوە پێكهێندرا و 14 چەكداری حەشدی شەعبی، كە لە هێرشەكەدا بەشداربوون، لەلایەن هێزە ئەمنییەكانەوە دەستگیركران.