راچڵەكین-

باڵیۆزخانەی ئەمریكا لە عیراق دەڵێت، ئەوانەی لەڕووداوەكەی ناوچەی ( دۆرە)ی بەغداد كوژراون، لەلایەن چەكدارانی كەتیبەكانی حیزبوڵای سەر بە حەشدی شەعبی كراونەتە ئامانج و پێویستە بەبێ دواكەوتن حكومەتی عیراق رادەستی دادگایان بكات.

ئەمڕۆ دووشەممە 28ی تەمووزی 2025 باڵیۆزخانەی ئەمریكا لەعیراق لە تۆڕی ئێكس بڵاویكردووەتەوە، سەرباری دەربڕینی سەرەخۆشی بۆ كەسوكاری قوربانیان و نیگەرانی لەبەرامبەر رووداوەكەی رۆژی یەكشەممەی ناوچەی دۆرە-ی بەغداد ئاماژەی بەوەكردووە:" قوربانییەكان لەسەر دەستی چەكدارانی كەتائیبی حزبوڵا كوژراون كەلەلایەن ئەمریكاوە خراوەتە لیستی تیرۆرەوەو سەر بە حەشدی شەعبییە."

ئەوەش روونكراوەتەوە:" قوربانییەكانی ئەو رووداوە لەریزی كارمەندانی پۆلیسی فیدراڵی و هاوڵاتیانی مەدەنیدان، هەربۆیە پێویستە حكومەتی عیراق رێكاری پێویست بگرێتە بەر بە بردنی ئەو چەكدارانەو سەركردەكانیان بۆبەردەم دادگا بەبێ دواكەوتن، لەبەرئەوەی لێپرسینەوە كارێكی گرنگە بۆ پارێزگاریكردن لە سەروەری یاساو رێگریكردن لە كردە توندو تیژییەكان."

رۆژی یەكشەممە، لەگەڵ دەستبەكاربوونی بەڕێوەبەرێكی نوێ لە فەرمانگەیەكی كشتوكاڵ لە بەری كەرخی بەغدا، ژمارەیەك چەكداری سەر بە هەردوو لیوای 45و 46 ی سەربە حەشدی شەعبی هەڵیانكوتایە سەر فەرمانگەكە. لە رووبەڕووبوونەوە لەگەڵ هێزە ئەمنییەكان، كارمەندێكی پۆلیسی فیدراڵی كوژرا.

بەهۆی رووداوەكەشەوە 14 چەكداری هەردوو لیواكەی حەشدی شەعبی لەلایەن هێزە ئەمنییەكانەوە دەستگیركران.